–Mynjur u Lat ka Jylla–
U Myntri Rangbah ka jylla Conrad K. Sangma hynne ka sngi ka 25 Nailar 2025 u la pyntikna ba naduh ka 1 tarik Naiwieng 2025, ka Sorkar Jylla ka la rai ban siew hi noh ia baroh ki tulop kiba kynthup jong ka KHADC, JHADC bad GHADC.
Ha kaba iadei bad kane ka rai, u Myntri Rangbah u la iathuh ba hadien ka jingialang bad ki Nongïalam jong ka GHADC kaba dei ruh ka council kaba mad jingeh mynta ha ka jingsahkut jong ki tulop da ki phew bnai, ka Sorkar ka la pyrkhat da kane ka lynti namar ka sngewthuh ba ka council ka mad jingeh ha kaba la ioh lum jingtip ruh ba ha ka shisnem ka council ka pynlut palat 70 klur na ka tulop (na ka bynta shi snem) katba ka jingioh kam kynjoh wat tang 30 klur ruh, ong u Myntri Rangbah.
“Ki council ki long kiba donkam bha ha ka jylla jong ngi, bad ka District Council ka dei ka dak lane ka shap kaba pyni ia ka kolshor bad ka tynrai jong ngi. Namarkata, ka dei ka kamram jong ka Sorkar Jylla ban pyntikna ym tang na ka bynta ka council hynrei na ka bynta ka jingiada ruh ia ka khyndew ka shyiap bad ka kolshor” pynpaw u Sangma.
“Kane kan long ka khana ka ban sah pateng. Kan don ka committee ka ban khmih ha kaba iadei bad kane” ong u Myntri Rangbah.
U la pynshai ruh ba kane ka jingshim rai kan ym dei ruh ka jingshim kabu, kata ba ka Sorkar kan ym don ka jingtuklar ia ka jingtreikam jong ki council hynrei ka jingthmu ka long tang na bynta ban kyrshan na ka bynta ban pyntikna ba ka council kan lah ban pynbiang ia ki jingsiew ha ka por ba biang khnang ba ka kam kan iaid beit.
