Ki nongialam ka KSU South Khasi Hills District ba hap hapoh ka Sohra bad Shella hynne ka sngi ka 25 tarik Nailar 2025 ki la wan iakynduh ia u CEM ka KHADC u bah Shemborlang Rynjah ban pan jingshai ha kaba iadei bad ka jingioh Labour licence bad Trading License ki bar jylla ha ka thaiñ Sohra.
Haba kren sha ki lad pathai khubor u President ka KSU South Khasi Hills u bah Reebok Diengdoh u la ong, ha kine ki sngi hadien ba ki nongialam KSU ki pynlong ka jingkhynra labour licence, ki nongialam ka KSU ki la lap ba ki don ki slip ba shu ai, ba ki bar jylla ki siew ha ka dor T.700/- tyngka bad kane ka kot ka dei tang na bynta 15 sngi bad ki la pynsngew sha u CEM ka KHADC. Na ka liang u CEM un sa iakren bad u EM jong ka Trade.
Shuh shuh u la iathuh ba ki la pynsngew ruh ha u CEM haba iadei ka jingmih ki iew ha katei ka thaiñ khlem da ioh jingbit na ka ophis District Council, ba kum kitei ki ïew dei ban khang khyrdep noh. Nalor kata u la pynsngew ha u CEM haba iadei ban pynkylla noh ia ki jaka kiba don sha kitei ki thaiñ kiba don ha ki ktien nongwei bad na ka liang u CEM u la pyntip ba yn sa khot ia ka jingialang hapdeng ki khlieh nongsynshar bad ki Sengbhalang.
U la pyntip ruh ba ka KSU ka la ban jur ruh haba iadei bad ka jingkhynra bad ka Seng kan sa ban jur ia ka District Council ban leit khynra lang bad ka Seng KSU khnang ba ym don mano mano ba tip bad ka Seng ka kyrpad ia ka District Council ban leit lang bad ka Seng ha kawei pat ka por haba iadei bad ka jingkhynra ia ki bar jylla ha ki thaiñ Sohra bad Shella.
Na ka liang u CEM ka KHADC u Bah Shemborlang Rynjah un sa pyntip haba iadei bad ka jingleit khynra lang.
