Ka Khasi Students’ Union (KSU) Barato Unit hadien ka jing jurip ïa kawei ka skul sorkar ha shnong Barato la lap shibun ki jingduna ha ka Barato Government Upper Primary School, na ka liang ka seng ha kane ka 25/8/2025 hapoh ka jingïalam samla Ehbok Sten kum u President, u Marki Pala Education Secretary bad ki katto katne ngut ki dkhot kila leit buh daka jingthoh ha ophis trei kam jong ka District School Education Officer West Jaiñtia Hills District na ka bynta ban khmih bniah ïa ka jingbit jingbiang katei ka skul.
Ka seng kala kyrpad na ki bor ba dei peit ban pynbiang ïa shibun ki jingduna naduh ka ïingskul (School building) kaba la jot bad ka bym i long shuh kham tam ha ki por lyiur bad kumjuh ïa ka kynroh jingker (fencing) namar kane ka skul ka don hapdeng artylli ki surok bad kam long shngaiñ ïa ki khynnah jong katei ka skul bad ruh ka paiñkhana (toilet) kane ka skul ka don tang kawei ka paiñkhana bad ka buh jingeh naduh ki nonghikai bad khynnah skul.
Haka juh ka por ka seng kala buh ruh ïaka jingujor pyrshah ïa ka Headmistress jong kane ka skul hadien bala ïoh ïa ka jingujor na kiba bun bad ka jinglap hi jong ka seng ba kane ka Nonghikai kam juh wan skul kum haka rukom badei bad ki khynnah skul ki kynduh shibun ki jingeh khamtam ha ki Subject jong katei ka Nonghikai bad na ka liang ka seng ka pynpaw ïa ka jingsngewkhia ïa ka jingleh kiba kum kine ki Nonghikai.
Kumta na ka liang ka seng hi kala kyntu ïa ki bor ba dei peit ban leh ïa kaba donkam namar kane ka skul ka long ka lad jingïarap ïa kiba bun ki khynnah ban ïoh lad pule namar kiba bun ki briew ha kane ka thaiñ kiba phah skul ïa ki khun da ki kam bylla bad ka rep ka riang.
Na ka liang ka office jong ka District School Education Officer kala kular ban shimkhia halor kine ki mat kiba ka seng kala pynsngew, ong ka kyrwoh na ka Seng.
