Hadien ka jingjia takhuh kali ba shyrkhei kaba la jia haka 21 tarik mynta u bnai ha Lad Mukhla hajan ka pung Thadlaskeiñ, West Jaiñtia Hills, kaba la wanrah ïa ka jingjia ba sngewsih da kaba duh ei ïa ar ngut ki mynsiem briew kynthup ïa i wei i khunlung iba dang 2 snem ka rta bad u wei u rangbah.
Mynta ka sngi u MLA ka Jowai u ma Wailadmiki Shylla uba dei ruh u Chairman ka MUDA ula khot pynlong ïaka jingïalang jong ka ‘District Road Safety Committee’ ka WJHD ha Highwinds Lake Side kaba kynthup naduh ka tnad DTO, ki tnad Pulit (Traffic), ka tnad ka koit ka khiah bad ka tnad PWD, ha kane ka sngi la khot ruh ïa ki nongïalam shnong jong ka Mukhla Pyllun baroh kawei.
Haba kren sha ki lad pathai khubor mynta ka sngi u ma Wailadmiki ula ong katei ka bynta jong u surok ha Mukhla kaba wanrah ïa ka jingjia ba sngewsih kala pynsyier mynsiem bad kiar ïa ki paidbah nongleit nongwan kumjuh ki khynnah skul ban ïaid na katei ka jaka namar ka jingbym shngaiñ na ki kali ki mator kiba ïaid lynti.
Ha kane ka jingïalang u MLA ula kyntu ban shna noh da ki lad jingïada kum ki Footpath ba biang, ki Speed Breaker, ki dak sign board kiba ai jingtip ïa ki nongñiah kali ban long kiba husiar haba poi ha ka kitei ki jaka.
Na ka liang u MLA mynta ka sngi ula hiar sa ha kawei ka jaka kaba buh jingma bha ïa ka leit ka wan jong ki kali ki mator kata ha ‘Mookyndur ka jaka ba khun bha bad kaba la ju wanrah ïa ka jingjia hap kali na ka por sha ka por.
Ha kane ka jaka u MLA ula kyntu ïa ki bor ba dei peit khamtam ka tnad PWD hashwa ban poi ha katei ka jaka ba khun dei ban wad ki lad ki lynti kumno ban pynjai jai ïa ki kali hashwa ban poi katei ka jaka bad ban buh ruh ki Speed Breaker bad ki road sign.
Kumba long mynta ula pynsngew ba u surok NH-6 u don haka jingpeit ka NHAI bad kane kala buh jingeh bha haka rukom treikam, kumta kaba donkam mynta ïa ka sorkar jylla “ban don ïala ka jong ka Fund na ka bynta jingbha jong une u surok khamtam haka por ba kyrkieh bad ban myntoi ka jingdon jong kane ka Road Safety Committee”.
Ula ong ka don ka skim jong ka sorkar na ka bynta kito ki nongïoh myntoi kiba la khlad na ka jingjia aksiden kaba long 2 lak tyngka bad kumjuh ïa kiba mynsaw kaba long 50 hajar tyngka.
Shuh shuh ula pyntip ba kane ka ‘District Road Safety Committee’ ka dei ban shim ïaki lad jingïada kata ban pynsngewthuh sha ki paidbah halor ka Road Safety da kaba pynlong ïa ki prokram ai jinghikai na ka por sha ka por.
