Ka Madan Jrisaleiñ ka dei kawei na ki madan kaba khring bha bad pynsngew tynnad ïa kiba bun balang ban wan ïalehkai ha kane ka madan naduh ka por dangstep bad khamtam haka por janmiet la sakhi baroh kawei ka madan ka dap lut da ki nongïalehkai phutbol paralok.
Kane ka madan Jrisaleiñ ka don hapdeng jong ka sor Jowai bad ka dei ruh kum ka ïit khmih ka Jowai, ym tang kata kala dei ka madan kaba la ai jingshakri ïa kiba bun ki samla ïalehkai ha ka kam ïalehkai Sport bad ka don hapoh u pud u sam ka Dorbar Shnong Chutwakhu, Jowai bad ka dei ruh ka madan kaba dei long trai daka Govt. Boys’ Higher Secondary School, Jowai.
Ha kane ka madan la pyndonkam shibun jait ki prokram sorkar kum ka Independent Day, Republic Day, ki Exhibition, ki Fate Shnong, ki Sports, ki jingïalang naduh ki Jingïaseng Paidbah, ki kam Saiñ Hima Sima, ka jaka pynïeng kali (parking) haba don ki prokram heh ha sor Jowai nalor kiwei kiwei de.
Na ka bynta ka jingbit jingbiang bad ka jingitynnad jong kane ka Madan na ka liang u MLA ka Jowai u ma Wailadmiki Shylla mynta ka sngi ula khot ïa ka jingïalang ha ophis ka Jowai Municipal Board (JMB) kynthup naduh ka Dorbar Shnong Chutwakhu, ki nongïalam na ka Kur Challam, ki bor pynïaid ka Govt. Boys HSS, ki bor District bad kumjuh na ka tnad PWD.
U ma Wailad haba hiar sha kane ka madan ha ka jingkren sha ki lad pathai khubor ula ong la idonkam ban pynbha pynmiat noh ïa kane ka Madan Jrisaleiñ namar ka jingdawa bad ka jingdonkam jong ki paidbah, kum u MLA ula pynpaw ka jingsngewkmen ba kane ka jingthmu jong u kan urlong noh shen bad kan long ka kam kaba kloi.
‘Kaba donkam eh hakhmat ban pynbha ïa kane ka madan ka long ban shna ïa ka Gallery bad ki kynroh (fencing) sha ka liang ba don u surok (Main road) bad lada long kaba lah yn shna ha baroh sawdong ka madan’, ong u ma Wailad.
Shuh shuh ula pyntip na ka liang ka tnad ba dei peit kan pynkhreh noh ïa ka estimate bad na ka liang ka Kur Challam bad ka Govt. Boys’ HSS ruh kin sa shim ïa ki lad ban ai jingtip kloi sha ki bor ba halor na ka bynta ban sdang noh ïa kane ka jingpynbha pynmiat ïa ka madan Jrisaleiñ, Jowai, la ong u ma Wailadmiki.
