Tang hadien 24 kynta ba la ioh ia ka khubor lyngba u Myntri Rangbah Conrad K. Sangma, ba Sorkar Jylla kan siew hi noh ia ka tulop na ka bynta 3 tylli ki District Council kiba kynthup ia ka KHADC, JHADC bad GHADC, u President ka Hill State People’s Democratic Party (HSPDP), Bah K.P. Pangniang u la ong ba shen ka Party kan sa leit ban iakynduh markhmat ia u Myntri Rangbah na ka bynta ban ioh ia ka jingpynshai kaba bniah halor jong ka jingshim rai jong ka Sorkar ban siew tulop ia ki DC naduh 1 Naiwieng 2025.
Ha kaba iadei bad katei ka mat, u Bah Pangniang u la ong, ba ka Party ka tip ba ki Council ki shem jingeh ha ka liang ka pisa tyngka ha kine ki khyndiat bnai, hynrei ka rai ba kyrkieh jong ka Sorkar ka la pynlong ia ki ban lyngngoh bad buh jingkylli namar ka dei ka rai kaba nyngkong eh ban iohsngew ha ka khana pateng jong ka Jylla.
“Ngin iakynduh ia u Myntri Rangbah kum ka Party namar ngim tip ia ka jingthmu jong ka Sorkar. Kum ka party, ngi kyrshan ia ka jingpynkupbor ia ki Council kumba la buh ha ka khyrnit kaba 6 (6th Schedule) jong ka India. Kumta ban ioh ia ka jingshai kaba kaba biang, shen ngin iakynduh ia u Myntri Rangbah” ong u President ka HSPDP.
