Ki Nongialam jong Meghalaya Pradesh Congress Committee (MPCC) hapoh ka jingialam jong u Manuel Badwar mynta ka sngi ka 28 tarik Nailar 2025 ki la phah da ka jingthoh sha u lamphang ka Ïingdorbar Thawaiñ u Thomas A Sangma ban pynduh jinglong dkhot na ka Ïingdorbar Thawaiñ kynthup ia u Dr Calestine lyngdoh, MLA Umsning, Bah Charles Marngar MLA Mawhati, Bah Gabriel Wahlang MLA Nongstoin, bad u MLA Mylliem Bah Ronnie V Lyngdoh.
Haba kren sha ki lad pathai khubor na ka liang u Bah Manuel Badwar Nongialam jong ka Meghalaya Pradesh Congress Committee u la pyntip ba ka MPCC mynta ka sngi ka la ai da ka jingthoh sha u Lamphang ka Ïingdorbar Thawaiñ ka jylla u Thomas A Sangma ban pynduh noh ia ka jinglong dkhot jong ki 4 ngut ki MLA kiba la phet na ka Seng Congress sha ka NPP.
Shuh shuh u la ong hadien ka jingbym don u lamphang ka Ïingdorbar Thawaiñ ka jylla , ki la aiti noh ia ka jingthoh sha u Commissioner & Secretary Bah Andrew Simmons.
Nalor kata u la pyntip ba ka shong ha ka jingstad u Lamphang ka Ïingdorbar thawaiñ ban leh ia kaba donkam bad lada u Lamphang um leh eiei , na ka liang ka Congress kan sa leit sha ki bor bahalor kum ka High Court bad Supreme Court haba iadei bad kane ka jingleh jong kine ki 4 ngut ki MLA ka Congress ba kynthup ia u Bah Charles Marngar, Dr Celestine Lyngdoh, Bah Gabriel Wahlang bad Ronnie V lyngdoh.
U la ban biang ngim kwah ba shu mait kyrteng beit ia kine ki 4 ngut ki MLA hynrei ka dei ban iaid katkum ki kyndon jong ka Riti Synshar jong ka Ri India. U la ong ban shu ailad ban shu leh maki katba mon kam dei ka rukom.
Na ka liang u Commissioner & Secretary u Bah Andrew Simmons u la pyntip ba u Lamphang ka Ïingdorbar thawaiñ un sa bishar ia kane ka jingai jingthoh jong ki nongialam jong ka Meghalaya Pradesh Congress Committee.
