Ka 29 tarik u Nailar jong u snem 2025 ka dei ka lyngkhuh sngi kha ba 120 snem jong u Major Dhyan Chand, uwei na ki nongïaleh Hockey ba pawnam jong ka Ri India, kumta na ka liang ka sorkar ruh kum ka dak ban kynmaw burom ïa u Major Dhyan Chand kala ai nam ïa kane ka sngikha kum ka ‘National Sports Day’.
Kumta ha West Jaiñtia Hills District ha kane ka 29 tarik u Nailar ki khynnah skul kiba don ha kylleng ki shnong hapoh ka Thadlaskeiñ, Laskeiñ bad Amlarem Block kila shim bynta shongshit ha ki jingïalehkai Sports bapher bapher.
Ka jingleh burom ïa ka ‘National Sports Day’ hapoh ka Ri India kan sdang naduh mynta ka sngi 29 tarik bad kan kut haka 31 tarik Nailar, 2025.
Ki jait jingïalehkai Sports kiba la ïoh lad ban pynïalehkai ïa ki khynnah skul ki long, ka jingïakop mareh (Race), Traditional Sports, Football, Fun activity for Children, Mass Drill nalor kiwei de.
Shuh shuh naka liang ki nonghikai kum shi bynta ban khring ïa ki jingmut jingpyrkhat jong ki khynnah skul shaphang ka ‘National Sports Day’ la ai ruh ka jingïathuh khana lyngkot shaphang u Major Dhyan Chand.
