U Working President jong ka KHNAM u Bah Thomas Passah hynne ka sngi ka 29 tarik haba kren sha ki lad pathai khubor halor ka jingong ka sorkar ban siew tulop hi noh ia ki nongtrei ka District Council u la ong, lada ka Sorkar ka kwah ban pynskhem ia ka District Council ka dei ban pyllait ia bhah ha ka por kaba dei, lada ka Sorkar ka leh kumta ki District Council ki lah ban ïeng ha la ki jong ki kjat.
Shuh shuh u la pynpaw lada ka sorkar ka kwah ban iarap ka dei ban ai beit da ka Grant bad ka District Council kan lah ban siew hi ia ka tulop sha ki nongtrei jong ka District Council.
U la bynrap “lada ka sorkar kan siew hi noh ia ka tulop ki nongtrei ka District Council ka mut ka budget ruh ka hap don ha ka sorkar ym shuh ha ka budget jong ka District Council”.
Na ka liang ka KHNAM ka kyntu ia ka sorkar ba ka dei ban ai beit ia ka bhah sha ka District Council khnang ba ka District Council kan ioh ban siew hi ka ka tulop jong ki Nongtrei. U la ong 75 snem ka la iaid la pynneh pynsah ia ka District Council, kine baroh 3 tylli ki District Council kim dei ban shah ia ka Sorkar ha ka kyrteng jong ka tulop ban ailad ia ka sorkar ba kan tuklar ia ki kam jong ka District Council.
Lehse ki nongtrei kin sngewtynnad hynrei ngim dei ban iapeiñ ia ka nongrim jong ka District Council khnang ba ka thymmei kan pynlong ia ka District Council ban saiñdur mandur ha ka jaitbynriew ba kan neh ba kan lah ban trei khambha.
