Na u Dy. Secretary ka JHADC pan jingshai ka JFEPA halor ka jinglongtrei ia ka Syntu Ksiar Fish Sanctuary

Hadien ba ka Jaintia Fishing and Environment Protection Association (JFEPA), ka la ioh jingtip ba kawei na ki shnong ha nongbah Jowai, ka la pynmih ia ka khubor ba ia ka Syntu Ksiar Fish Sanctuary, kala dep ban shim kti ia kane ka jaka bad kala pynmih ruh ia ki hukum ban maham ia kino kino kiba khwai tuh ne leh sniew ha kane ka jaka.
Halor kane ki dkhot jong ka JFEPA hapoh ka jingialam jong u President ma DH Pde, mynta ka sngi ki la leit ban ia kynduh ia u Deputy Secretary ka JHADC, ban pan jingshai halor kane ka kam, ha ka jingiakynduh bad u Deputy Secretary ka JHADC, u la ong ba na ka liang ka ophis (JHADC), kam shym la ai jingbit ne ai bor ia kano kano ka seng ne ka shnong na ka bynta kane ka Syntu Ksiar Fish Sanctuary, ne sha kiwei pat ki seng lait noh tang ia ka Jaintia Fishing and Environment Protection Association (JFEPA), ha kaba u la sngewphylla ruh halor kane ka khubor kaba la mih.
Ki nongialam jong ka JFEPA kila iathuh ia kane ka Fish Sanctuary ha Syntu Ksiar ka Jaintia Fishing ka la ioh ia ka No Objection Certificate (NOC) naduh u snem 2015 ha kaba la dep ban pynthymmai ne renew biang ia ka ha u snem 2021, ha kaba ia kane ka Fish Sanctuary haduh mynta ka dang hap hi hapoh ka jingpeit jingsylli jong ka JFEPA.
Kumta halor kane ka JFEPA, ka la kyrpad ia baroh ki nongshong shnong ka nongbah Jowai ba kim dei ban shah ialam bakla ne sngewthuh bakla halor kine ki khubor bym shisha.