Kawei na ki Block kaba ba la rim bha hapoh ka jylla kaba la sdang treikam naduh u snem 1973 kaba don hapoh ka West Jaiñtia Hills District ïa kaba la tip kum ka Laskeiñ C&RD Block bad ïa kane ka Block la sngewdei da ki paidbah bad ki kynhun sengbhalang ban dawa kyntiew kyrdan noh ïa ka sha ka Civil Sub-Division.
Ïa ka ‘Jingïalang Paidbah’ la khot pynlong mynta ka sngi Saitjaiñ 30 tarik u Nailar da ka Jaiñtia Students’ Movement (JSM) ha madan phutbol Mukhap, Laskeiñ Block, West Jaiñtia Hills District ha kaba ki nongshong shnong ka thaiñ Laskeiñ C&RD Block kiba don da ki spah ngut kila poi sha kane ka jingïalang ha ryngkat ka jingdonlang ki Rangbah Shnong, u ma Nehimaya Tyngkan, u MDC ma Daemi Liam, ki nongïalam ba hakhmat jong ka JSM naduh u President Central Body ma Leningstar Rymbai, ki nongïalam ka CEC, na ka Western Region bad ki dkhot ka JSM napoh West Jaiñtia kumjuh na ka Central Body.
Ha kane ka jingïalang da kawei ka sur kila rai ban pynkhlaiñ shuh shuh ïa kane ka jingdawa na ka sorkar jylla tad haduh ban da ïoh pura ïa ka kyrteng jong ka ‘Laskeiñ Civil Sub-Division’, ha kane ka sngi la rai ruh ban thaw da ka Committee kaba kynthup lang ïa ki Rangbah Shnong hapoh ka thaiñ Laskeiñ Block, ki Daloi, ki riew pawkhmat bad ka seng Jaiñtia Students’ Movement (JSM).
Kiba bun na ki nongkren kiba pynsngew ïa ka jingdonkam ban ïoh noh ïa ka Civil Sub-Division ha katei ka thaiñ, khnang ban kham pynsuk ïa ka jingtreikam na ka bynta ki paidbah nongshong shnong bad kumjuh ïa ki kam pynroi (Development) kiba bun hapoh ka thaiñ Laskeiñ.
Hadien kane ka ‘Jingïalang Paidbah’ kala don ka jingïasoi kyrteng kum ka dak ban kyrshan ïa kane ka jingdawa Civil Sub-Division bala shim bynta shitrhem da baroh kiba la wan sha kane ka jingïalang.
