Ha ka jingïai buddien jong u Bah Reachingson Siangshai na ka bynta ka RTI kaba u lah dep ban buh ha ka 31 tarik u bnai July 2025 ka RTI kaba lai ban ïoh ïa ka jingtip ha ka jingïadei bad ka rukom thep kam thep jam hapoh ka district lyngba ka DSC.
Ha ka 1 tarik u bnai September 2025 u Bah Siangshai u la wan biang ban ïakynduh ïa u PIO ban kylli ha ka jingïadei bad ka RTI kaba u lah dep ban buh naduh ka 31 tarik u bnai July 2025 bad na kaei ka daw ba ki pynslem ban ai ïa ka jubab.
U Bah Reachingson Siangshai haba kren sha ki lad pathai khubor u ong ba ka por ba u PIO u dei ban ai ïa ka jubab ha ka jingïadei bad ka RTI kaba u lah dep ban buh ka lah kut por kaba mut ka lah palat ïa ka 30 sngi na ka sngi kaba u lah dep ban buh.
Shuh shuh u Bah Reachingson Siangshai u ong ha ka jingpyrshang ka jong u ban ïakynduh ïa u PIO ha ka jingïadei bad kane ka RTI u PIO u phah ban ïakynduh bad ka dealing assistant bad haba u Bah Siangshai u kylli pat na ka dealing Assistant ka ong ba ka information kam don ha ka bad u hap ban ïakynduh ïa u DC.
Na ka liang u Bah Siangshai u la ong ruh ba kumno u hap ban leit ban ïakynduh bad u DC haba u DC u dei tang u Chairman bad ka information kaba u dei ban ïoh ka dei beit ba u hap ban ïoh na u Public Information Officer (PIO).
