Ka Synjuk ki nonghikai ba hap hapoh ka shatri jong ka Federation of All School Teacher of Meghalaya (FASTOM) ka la iakynduh jingeh haba iadei bad ka jingsiew tulop.
Haba kren sha ki lad pathai khubor mynta ka sngi ha Shillong Press Club, u Vice President ka FASTOM u Bah Sanborn Jungai u la ong ba ki nonghikai ad-hoc ha kylleng ki kyrdan bapher bapher ki dang iai bteng ban shakri namar ka jingsiew kaba duna. Kat kum ka jingïathuh jong u, ki nonghikai Lower Primary ki ïoh ₹18,000 shibnai, Upper Primary ₹22,000, Secondary ₹29,000, Higher Secondary ₹33,000, ki nonghikai Science ki ïoh tang ₹31,000 shibnai bad ki nonghikai hindi ₹ 18,000 shibnai.
U la pynpaw ia ka jingsngewsih ba katba kitei ki nonghikai ki ai jinghikai ïa ki hajar ngut ki khynnah skul ha Meghalaya, ki shem jingeh ban pynbiang ïa ka jingpule kaba paka na ka bynta jong ki khun jong ki namar ka jingkyrduh pisa. “Ngi dei napdeng ki nonghikai kiba shah iehnoh beiñ tam ha Meghalaya. Ka long kaba pynduh mynsiem bad pynduh jingkyrmen ban ïohi ïa ka jinglong jingman kaba mynta,” u la ong.
Utei u nongïalam ka FASTOM u la pynpaw shuh shuh ba tang kawei ka lad kaba sah na ka bynta ki nonghikai ka long ban mih sha surok ban iakhih haba iadei bad ka jingkynduh jingeh ki nonghikai Adhoc, u la pyntip ba ka synjuk ka la rai ban pynlong da ka jingialang ha kaba ïa ki jingtip ba bniah yn sa rai ha ka jingïalang kaba la buh ban long ha ka 13 tarik Nailur 2025.
