U Chairman jong ka District Council ka KHADC u Bah Strong Pillar Kharjana ryngkat ki MDC jong ka seng Voice of the People Party na ki constituency kiba hap ha ki jaka sor mynta ka sngi ka 2 tarik u Nailur 2025 ki la pynpaw ïa ka jingsngew bynñiaw namar ka jingrit palat jong ka scheme ha ki constituency jong ka sor Shillong ha kaba ula ïathuh ba ha ka constituency jong u, u ïoh tang 30 lak.
Ki MDC ki la pynpaw ruh ïa ka jingsngew lyngoh ïa ka sorkar jylla ba hadien ba ki la buh ïa ki scheme, ka sorkar jylla kam shym la ai jingtip na kino kino ki tnat treikam hynrei ka la shu khot tender kyndit kyndit.
U Bah Strong u la pynpaw ba ka scheme ka dei kaba la pan da ma ki hynrei ka sorkar jylla kam shym la ai jingtip eiei shwa ba kan khot tender, u Bah Strong u la buh jingkylli ruh ïa ka sorkar ba lada ka ong ba ka khot tender namar ba ka dei ka scheme kaba wan na ka jylla balei kam khot tender ruh na ka bynta ka scheme MLA.
Shuh shuh u la ong ba kim pyrshah ïa ka scheme hynrei ki pyrshah ïa ka rukom pyniaid ïa ki scheme ha kaba ïa ki kiba dei ki MDC kiba hab ha jaka sor la shu ïaid lait khlem pyntip.
U la buh jingkylli ruh ba haba la ai tender mano pat ban kit khlieh ïa kita ki scheme namar ba ki paidbah ki tip ba ka dei ka ka scheme MDC bad lada kam biang ka jingtrei ïa ki scheme ki paidbah kin kynnoh ïa ki MDC.
Kumta ki la pynpaw ïa ka jingpyrshah ïa kane ka jingleh jong ka sorkar bad ka ophis jong ka KHADC ki la thoh sha u Chief Executive Officer jong ka Municipal ban pyrshah ïa kane ka tender ba la pynmih da ka Municipal.
Shuh shuh u la pynpaw ïa ka jingsngew lyngoh ba ki scheme kiba ki la pan ki don shibun katba u contractor pat la buh tang uwei ban pyntrei ïa baroh ki scheme ha baroh 7 tylli ki shnong.
