Mynta ka sngi ka MLA Sutnga-Saipung, kong Santa Mary Shylla, ryngkat ka jingïadonlang ki heh sorkar ka District bad ki paidbah nongshong shnong, ki la plie paidbah ia ka Miyawaki Afforestation Project ha shnong Narwan (Kmai Prut), kaba hap hapoh ka Saipung Block, kaba dei ka projek ban pynim biang ïa ki dieng ki siej kiba la shah ktah na ka jingtih bad khlong maw kumjuh kiba jaka ba shah ktah ha ka mariang. Kane ka projek ka kynthup haduh ar hectare ka jaka bad kaba la ïoh jingïarap pisa na ka District Mineral Foundation (DMF), kaba la kot sha ₹16.5 lak tyngka.
Ha ka jingkren jong ka kong Shylla, ka la kdew ba ka long kaba donkam ban ïaid ryngkat ha ka roi ka par bad ka jingpynneh pynsah ïa ka mariang, bad ka la kyntu ruh ïa ki paidbah ban shim bynta lang ban pynneh pynsah ïa kane ka projek.
U Deputy Commissioner jong ka East Jaintia Hills, u Shivansh Awasthi, u la pynpaw ïa ka jingdonkam bad ka jingkordor jong kane ka projek bad u la ngeit skhem ba kiwei pat ki projek ruh kin sa mih shakhmat da ka jingïarap pisa kum na ka Meghalaya Environment Protection and Restoration Fund (MEPRF).
Kiwei pat kiba donlang bad ai jingkren ha kane ka sngi ki kynthup ia u SDO Manish Kumar, BDO Dr. R Pyrtuh, ki la pynshai shuh shuh ïa ki jingmyntoi ba ioh na ka mariang. Lyngba kane ka projek kan pynlong ïa ki dieng ban san kloi, khlem da donkam ban peit ne sumar bniah palat.
Ha kane ka sngi, la pynlong ruh da ka jingthung dieng paidbah, kaba pyni kum ka dak ka jingïatrei lang jong ka shnong bad ki bor sorkar ban wanrah ia ka jingiatylli ha ka ban pynneh pynsah ia ki deing ki seij bad ki khlaw ki btab.
La kdew ba ka Miyawaki Afforestation Method, kaba la kyntiew da u Akira Miyawaki, u stad Botani kiba na Japan, ka dei ka rukom thung dieng kaba ïarap ban pynlong ia ki dieng ba kin heh kin san kloi.
