Ka long ka sngi kaba kyrpang na ka bynta ki paidbah jong ka Ri-Bhoi khamtam ia kiba shong shnong hapoh ka Jirang Constituency, ba ka Jirang Organic Agro Farmers Producer Company Ltd kaba don ha Nonglum, New Jirang, Ri-Bhoi District kaba dei ruh ka kynhun jong ki Nongrep na ka thaiñ Ri-Bhoi ka la seng ia ka Karkhana pynmih Umsoh ia kaba la tip kum ka “Meghalaya’s First Aseptic Pulping Unit and Mandarin Sorting, Grading and Waxing Unit” ia kaba la plie paidbah da ka Kong Ampareen Lyngdoh, Myntri ba khmih ia ka Tnad ka Rep ka Riang jong ka Jylla hynne ka sngi ka 4 Nailur 2025 ha ka jingdon ryngkat u MLA ka Jirang Constituency, Bah Sosthenes Sohtun bad kiwei kiwei.
Ia kane ka karkhna kaba long ka jingmyntoi ia ki nongrep ki bym don jingtip lane ka kabu kumno ban pyniaid iew ia ki jingrep jong ki, la kyrshan da ka Sorkar ha ka jinglut kaba kot shi klur sanphew lak.
Haba ai jingkren ha kane ka sngi, na ka liang ka Myntri ka la iathuh ba kane ka thong ka dei tang lyngba kane ka Sorkar ba lah ban wanrah, kata hapoh ka jingialam jong u Myntri Rangbah Conrad K. Sangma, ha kaba la pynkylla dur ia ka rukom im jong ki Nongrep ha ki thaiñ Nongkyndong da ka jingkyrshan lyngba ki skhim MLAMP, FOCUS, FOCUS+ bad ka CM Farm.
Ka Jirang Organic Agro Farmers Producer Company Ltd ka dei ruh ka kynhun kaba la lah ban pynpoi ia u Sohniamtra uba shngiam tam ha ka Ri India sha Dubai. Ka jinglah jong kane ka kynhun ban pynurlong ia ka jingangnud ban pynpoi ia u Sohniamtra sha Dubai ka dei lyngba ka jingiamynjur ban iatehlok (partnership) bad ka kynhun Lulu Group International.
Ka Myntri ka la ong ba kaei kaei kaba ngi leh dokam ban trei shitom bad ia tuid lang ha kajuh ka jingmut “Lada phi iatreilang, iasnohktilang, ym don kano kano kaba ym lah ban leh” ong ka Kong Ampareeen. Ka Myntri ka la iathuh ba kine ki skhim ba bun jait ki dei lyngba ka jinglah jong ka Sorkar Jylla ban pyrkhat ia ka bha ka miat ka roi ka par jong ki nongrep. “Wan sha ngi ka Sorkar ngin leh ia ka kam, namar ka kamram jong ngi ka long ban ai ia kaba phi donkam bad ka kam jong phi ka long ban pyntreikam namar ngim lah ia kaba phi leh”. Shuh shuh ka la ong “wat ong ba ka Sorkar kam leh ei ei, kum kine keiñ ki dei kita ki Sorkar ba ka leh” ong ka Myntri.
