U nongwad RTI u Reachingson Siangshai u la wan biang sa shisien ha ka office jong u DC ka EJHD, ha ka jingïadei ban wad ïa ki jingtip lyngba ka RTI Act 2005 ha ka rukom thep kam thep jam hapoh kane ka district lyngba ka (DSC) District Selection Committee kaba la pynlong hapoh kane ka district ha ki katto katne bnai kiba lah dep.
Kane ka jingwad RTI jong u Bah Siangshai ka long hadien ba ki nongthep kam thep jam ki la ud bad ki la kyrpad sha u ba un leh eiei na ka bynta ka jong ki namar ba katkum ka jing ong jong ki khynnah samla kiba thep kam thep jam hapoh kane ka district kim shai bha ha ka rukom thep kam thep jam, u Bah Siangshai da ka mynsiem ban ai ïa ka jingshakri u la pdiang ïa kane ka jingtyrwa ba u la sdang noh ban file ne buh nyngkong ïa ka RTI katta ha ka 16 tarik u bnai May 2025.
Hadien kane ka RTI kaba nyngkong eh kaba na ka liang U Bah Siangshai u lah dep ban buh bad haba u la ïoh ïa ka jubab haba u pynshai sha ki lad pathai khubor na ka liang ka jong u, u ong ba ym pat sngewbiang katta ka rukom ai jubab jong ka DSC sha u, u Bah Siangshai u la file biang da ka RTI kaba ar katta ha ka 9 tarik u bnai July 2025 bad ïa kane ruh haduh mynta ym pat ïoh ïa ka jubab.
Ha ka 31 tarik u bnai july 2025 u Bah Siangshai u la wan biang ban buh ïa ka RTI katta ka dei ka RTI kaba lai kaba u lah dep ban buh bad na ka daw jong ka jingpynslem ka DSC ban ai ïa ka jubab ha ka 1 tarik u bnai September 2025 u la pyrshang ban ïakynduh ïa u PIO ban ïoh ïa ka jubab na kaei ka daw ba pynlong ïa ki ba kin slem ban ai ïa ka jubab.
Ha ka 4 tarik u bnai September 2025 pat u Bah Siangshai u la pynkhreh ban shim ïa katta ka RTI kaba lai kaba u lah dep ban buh naduh ka 31 tarik u bnai July 2025 bad ïa kane ka RTI namar ka sla jong ka, ka lah poi shaduh kumba 2609 sla ki paidbah nongkyrshan ki la noh synniang da ki pisa nar kiba long ki khutia khnang ba un ïoh ban shim ïa kane ka RTI kaba lai kaba kot shaduh ka 5218 tyngka.
Na ka liang u Bah Siangshai u ong ba kane ka dei ka jingthrang jong ki samla wad kam wad jam ban ïoh ïa ka jingtip kaba shisha la ka don ne em ka jingleh ka bym shai ha kane ka DSC bad na katta ka daw ki nongkyrshan ki la noh synniang ïa u da ka pisa nar ban siew ïa ka bai RTI.
