Shi bynta ban rakhe bad lehkmen na ka bynta ka sngi ba kyrpang jong ki Nonghikai (Teacher’s Day), u Rakkam A. Sangma – Myntri ba khmih ia ka Tnad Pule Puthi ha ka Jylla u la ai khublei bad iaroh halor ka jingkheiñduh bad ka synniang jong ki Nonghikai na ka bynta ban saiñdur ia ka lawei jong ki samla da kaba jied ban long kum ki Nonghikai. Ban burom ia ki Nonghikai halor ka matti jong ki, u Myntri u la pyntikna ba ka Sorkar lyngba ka Tnad Pule Puthi ka la pynkhreh ia kaba bha tam na ka bynta jong ki.
U Sangma u la iathuh ba ha kine ki khyndiat snem, ka Sorkar ka la wad ia ki lad ki lynti ban pynmyntoi na ka bynta baroh ki Nonghikai kiba don ha ki tnad hikai bapher bapher. U Myntri, u la kular bad pyntikna ba ka Sorkar ka la pynkhreh ban pynbiang ia ki jingdonkam ki nonghikai bad ki skul, kata da kaba tei ia ki skul, ka jaka sah jong ki Nonghikai bad maramot ia ki skul kiba la rim bad kiba la jot rathai.
Ha kane ka sngi ba kyrpang jong ki Nonghikai, u Myntri u la ai khublei ia baroh ki Nonghikai kiba don ha ka Ri “Na ka liang ka Sorkar Jylla, nga pynpaw ka jingaikhublei Sngi kyrpang ia ki Nonghikai kiba don ha kylleng ka Jylla bad ha ka Ri India, na ka bynta ka jinglah jong phi ban synniang ha ka ban kyntiew ia ka pule puthi. Phi long ki paia jong ka Ri. Ka jingsynniang jong phi kan batai ruh ia ka lawei jong ki briew ha ka Jylla bad ka Ri hi baroh kawei” pynpaw u Sangma.
Shuh shuh u la ong “Namar kata, ngi don barabor bad ki Nonghikai ha kaba u Myntri Rangbah bad ka Sorkar hi baroh kawei ka kut jingmut ban ai ia kaba bha tam sha ki Nonghikai kiba don ha kane ka Jylla, hynrei kane kan iaid shakhmat ryngkat ka jingiatreilang jong ki kynhun Nonghikai. Ka Sorkar ka donkam ia ka jingkyrshan jong baroh na ka bynta ban jam sha shiliang”.
