U Chairman ka NPP Farmers Front u Bah H.M Shangpliang bad u Secretary u Bah Eugene Kurkalang ha ka 6 tarik Nailur 2025 ki la wan ban pynskhem ia ki Nongialam ka West Jaiñtia Hills District NPP Farmers Front bad ka NPP Block Farmers Front ha ka jingialang kaba la long mynta ka Sngi ha ïing Dorbar Shnong Mynthong Community Hall.
Ha kane ka jingialang pynskhem ia ki nongialam ka Farmer’s Front la don ryngkat u Bah Wailadmiki Shylla MLA jong ka thaiñ u ba long kum u Kongsan ha kane ka sngi lem bad kiwei de ki nongialam, ryngkat da ki phew ngut ki nongrep na West Jaiñtia District kiba la wan ban pyndap smam iaka hall haka jingpynskhem ia ki nongialam ka NPP Farmer’s Front.
Ki nongialam kiba la pynskhem bad pynkup bor mynta ka sngi ki kynthup ia u Bah Mutshuwa Thabah kum u President ka NPP District Farmers front u Bah Damechwa Dhar kum u Secretary bad la Pynskhem bad ai ruh iaki syrnod ia ki nongkitkam ha ki Block bapher bapher kiba hapoh ka District.
Ha kane ka sngi, na ka liang u Bah H.M Shangpliang kum u Chairman bad u Bah Eugene Kurkalang kum u Secretary, jong ka Meghalaya farmers front ki la pynshai sha ki nongrep, ba ka thong ba ka NPP ka la buh ia kane ka Farmers Front, ka dei ka ban iarap kyrpang na ka bynta ki nongrep hapoh ka jylla. Lyngba kane ka Farmers Front kin lum jingtip ia ki nongrep bad ki jingeh kaba ki ia kynduh ha ka jylla bad nangta kin sa thaw ia ki lad ki lynti ban iarap kyrpang na ka bynta ki nongrep.
U Bah Shangpliang u la kren ruh ba ka sorkar NPP ka dei ka sorkar kaba phai khmat sha ki nongrep ha ka jingialam u Myntri Rangbah u Conrad K. Sangma bad u Bah Prestone Tynsong kum u symbud myntri ki la buh ia kane ka shnat treikam ka long ban phai khmat kyrpang tang na ka bynta ban iarap kyrpang ia ki nongrep da kaba kin thaw ia ki skhim bapher bapher ban myntoi ki nongrep.
Shuh shuh, u la ong ruh ka sorkar NPP ka la thaw ruh ia ka farmers Front kin long kum ki Shipai jong ka NPP ba kin lah ban iakhun ia shibun ki jingeh ha kaba iadei bad ka Farmers Front kumjuh ia ka Party NPP.
Bad u la pynpaw ruh kum ka skhim Focus bad ka CM assure, CM elevate kine ki dei ki skhim kyrpang ba la buh na ka bynta ki nongrep bad nalor kata ka sorkar ym tang ba kan ai ia kita ki lad jingiarap sha ki nongrep, hynrei kin thaw lad ruh ban don kata ka iew ka hat namar kum ki nongrep lada ym don dor ki mar ki mata kin nym ioh jingmyntoi satia, u la bynrap.
Naka liang jong u Wailad u la pynpaw bad ai jingiaroh ia ki nongialam jong ka farmers front “Ba ngi kum ki nongtrei haba ki Nongialam ki la pyni hangi, ngi ruh ngi kular ban trei shitom wat la da ngi duna ka ktien hynrei ngin trei beit daka kam.
