Ka Diocese Jowai ka la pynlong ia ka sngi burom jong ka (Diocese Day) hynne ka sngi (07/09/2025) ha Parish Mynsngat, ha kaba da ki hajar ngut ki paidriewngeit na ki Parish bapher bapher kata Jowai, Amlarem, Phramer, Ladrymbai, Ladlakadong, Lumshnong, Umkiang, Khliehriat, Jalaphet, Sutnga, Mookyndeng, Barato, Namdong, Iongshiwiat, Ummulong bad Sahsniang Parish, ki la iatuid sha Parish Mynsngat bad la nangpynkhraw bad iatuid shuh shuh ki paidriewngeit ba ka dei artat ka sngi rakhe Silver Jubili jong ka Kynhun Balang Barit (KBB), ka Jubili ka Katholik Association Jowai Diocese bad ka Jubili jong ki Khynnah Shakri Duwan. Ha ka juh ka ka sngi jia ryngkhat bad ka jingpynbna riewkhuid ka Balang ia u Pier Giorgio Frassati bad ia u Carlos Acutis.
U Most Rev. Bishop Ferdinand Dkhar D.D. Bishop ka Jowai Diocese u long u kongsan ha baroh ki jinglehniam. Haba kren ha kane ka sngi (Homily speech) u ong ba ka Hima U Blei ka donkam ia ki riew aitilut, ki ban aiti nadong shadong, ki ban klet ialade bad ban im sngi ban pyndep iala ka deity bad ka jingklet ialade ka dei ban ialam sha ka jingshlur bad ban kloi ban leh ia ki kam radbah ki ba bha na ka bynta ka Hima ka jong U Blei bad na ka bynta ka bha ka miat ki para-briew.
Ka Diocese day ka dei ka sngi kaba kum ki khun jong ka Diocese ki ia kynduhlang kum kawei ka iing ka sem bad haba phai sha ka Kynhun Balang Barit (KBB) jong ki Parish bapher bapher, u Bishop Ferdinand u kyntu ia ki ban pule bad im sngi ia ka ktien ka jong U Blei naba ka ktien ka jong U Blei ka ai ia ka mynsiem jingiaieid bad jingiatylli hapoh ka Balang kum shi-ïing shisem.
Haba phai sha ki Head Katekist, ki Rangbah Balang, ki Kmie Balang, ka Synjuk Seng Rangbah, ka Synjuk Kynthai Katholik bad sha ka Seng jong ki Samla ka Jowai Diocese Catholic Youth Movement (JDCYM), u Bishop u kyntu ia ki ba kin long kum ki Apostol ban iarap bad ban ai mynsiem ia ki paidkhristan jong ka Balang ban long ki Khristan ki babha bad ban iatylli kawei kumba u Jisu u khmihlynti bad u kwah ba ki Nongbud jong u kin long ki radbah, kiba dap shynrang, kiba dap kynthei ym kiba rit mynsiem, ym kiba jemrngiew bad ym kiba khawpud na ka bynta ka bha ka miat ka Hima u Blei bad ha ka jingiadei para briew.
Haba u phai sha ki dkhot ka Katholik Association bad sha baroh ki paidriewngeit, u ong “Nga u Bishop, ki Lyngdoh, ki Brother, ki Sister ngin long kiba ia sariem ban long kum U Khrist ban long kiba kmen borabor ban long Katholik bad ban ieid thoiñ thoiñ ia ka Balang bad kiba kloi ban da ia ka”. U Bishop Ferdinand u pynkut ia ka jingkren sneng kren kraw jong u da kaba ong “Kane ka dei ka snem jubili bakhraw jong ka jingrakhe jingdap 2025 snem, ngi donkam ban ia treilang ia iaidlang kum ki Pilgrim ha kane ka snem jubilee namar kata, nga kyntu ia baroh ban iatylli lang bad ban ia iaidlang bad ka Balang Salonsar bad ban long ki riew aitilut ha ka ban pynheh pyniar ia ka Hima ka jong U Blei bad ha ka bha ka miat ha ka longbriew manbriew kumba la saiñdur da u Blei Nongbuh Nongthaw” pynkut u Bishop Ferdinand Dkhar.
Ha kane ka sngi la don lang ruh u Fr. George Jacob, Secretary BEC of CEBI, na Mumbai, uba la mihkhmat na ka bynta ka Catholic Bishop Conference of India ban iasakhi lang ia kane ka Diocese Day jong ka Jowai Diocese.
