-Hiar Shuki u Symbud Lamphang ha ka sngi sdang jong ka Dorbar Synrai, Shong Dorbar ka Kurim u MR ha ka sien ba nyngkong-
Mynta ka sngi ka 9 Nailar 2025, ka Dorbar Synrai jong ka Jylla hapoh ka jingialam jong u Lamphang (Speaker) Thomas A. Sangma ka la ioh ban sdang da ka “Government Buisness”. Ka jingialang ka la sdang ruh khlem ka jingdon jong u Symbud Lamphang (Deputy Speaker) namar ka jinghiar shuki kynsan noh hynne ka sngi da ka jingmynjur lang jong ka Party N.P.P, kata hapoh ka jingialam jong u Myntri Rangbah, Conrad K. Sangma.
Katba ka Dorbar Synrai ka dang iaid kumba 20 minit ei ei, u Bah Adelbert Nongrum – MLA 17 – North Shillong Constituency u la ieng kynsan ban pan jingpynshai na u Lamphang halor ka jingpynkynriah jaka shong jong ka Dorbar ia u khlem da ioh kano kano ka jingpynshai “ngam kwah ban pynthud, hynrei nga kwah ban ioh ia ka jingpynshai, balei la pynkynriah ia nga shadien. Ha ka Dorbar kaba lah dep, nga don ha khmat (ha kajuh u lain bad ki MLA ka Seng VPP) hynrei mynta phi buh ia nga shadien. Ngam tip ia ka daw, kumta nga kwah ia ka jingpynshai” ong u Bah Nongrum. U la ong ba ka VPP ka la ai ia ka shithi sospen ia u ha ka 24 Lber 2025, hynrei ha katei ka shithi ym shym la thoh shai ia ka Kyrdan lane ka jingbatai shai ba u dang dei u MLA. Ha kaba iadei bad kane u Lamphang u la ong ba yn sa iatai ia kane ka mat ha ka kamra jong u, kata hadien ba kut ka jingialang namar kane kam dei ka por bad ka jaka ba biang ban iakren ia kane ka bynta.
Ha kane ka sngi, u Lamphang u la pynpaw ruh ka jingkmen ban pynithuh ia ka Mehtab Chandee Agitok Sangma kaba dei ka MLA kaba la jop ia ka Elekshon shiteng samoi na 56- Gambegre Constituency kaba dei ruh ka MLA kaba sdang ia ka jingiaid lynti ba thymmai ha ka Sain Hima bad ban shong Dorbar ha ka sien ba nyngkong. Ka Mehtab kaba dei ruh ka Kurim jong u Myntri Rangbah Conrad Sangma, ka la jop ia ka Elekshon shiteng samoi na ka jinghiar shuki noh jong u Saleng A. Sangma na ka daw ba u la jop ia ka Elekshon MP Lok Sabha ha ka 23.11.2024.
