U Working President jong ka KHNAM u Bah Thomas Passah hynne ka sngi ka 8 tarik Nailur 2025 haba kren sha ki lad pathai khubor u la pyntip ka KHNAM ka ai jingkyrshan ia ki jingiakhih ba la rai da ka AMTTA halor ka jingbym shah ia ki kali Assam ban leit sha ki jaka jngohkai.
U la pyntip ba ka Khnam ha u snem 2017-2018 ka la ai da ka jingthoh sha ka sorkar, haba iadei bad ka jingwan ki kali nabar sha ka jylla khamtam sha ki jaka jngohkai, bad ka la pyntip ba dei ban peit nuksa kum ka jylla Sikkim.
Ka Sikkim kam ju shah ia ki kali nabar ban wan sha ki jaka jngohkai ,bad ki kali kiba wan sha Sikkim ki hap shim da ki kali na Sikkim ban leh sha ki jaka jngohkai Pyrthei.
Na ka liang ka KHNAM ha kito ki snem ka la pyrshang ban kynduh ia ki Transport Minister, ki Minister sorkar hynrei, ka wan ka jingkylli lada shang khang ki kali Meghalaya sha Assam kaei ban jia .
Nalor kata u la pyntip ki kali na jylla kim ju ioh ban kamai sha ki jaka jngohkai ha Assam, hynrei kut tang ha Airport bad ha ki Railway Station.
Ka KHNAM ka pynshai ba khlem ong ba ym shah shuh ia ki kali Assam ban wan sha Meghalaya, hynrei dei ban wan ialam ia ki nongjngohkai ha ISBT Mawïong bad na Mawiong sha jaka jngohkai kin ialam da ki trai kali na ka jylla, namar ki tip bha ia ki jaka jngohkai bad kumjuh na ka bynta ka jingshongshngain ki nongjngohkai pyrthei.
Ka Sorkar ha u 2017 ka don jingkyrmen bad kane ka sorkar MDA kam kwah ban pyndep ia kane ka mat bad ka dei hok ia ki nongniah tourist ban pynpaw ia kane namar dei ma ki kiba im ja ban kamai na kane ka kam.
Ka sorkar kam pyntikna ba ki nongniah kali kin ioh kamai bad ioh bainong na ka kam jngohkai pyrthei bad da kaba shai ka Sorkar kam kwah ba ki khun samla kin ioh jingmyntoi na ka kam jngohkai pyrthei.
