Ka Student Police Cadet (SPC) jong ka Govt. Upper Primary School, Barato ki la leit ban jngoh ia ka Barato Police Outpost, West Jaintia Hills mynta ka sngi (9/9/2025) na ka bynta ban ioh jingtip halor ka rukom treikam jong ki Pulit.
Ia kine ki khynnah skul la pdiang burom da u Officer Incharge Barato Outpost u SI Wilfred Jala. U bah Jala ryngkat u ma Sihon Sumer (UBC) bad u Chisakwasa G Momin (UBC) kila ai ka jingbatai shaphang ka kamram bad ka jingkit khlieh ba kongsan jong ki Pulit kiba don hapoh katei kak Police Outpost.
Kila batai shai shaphang kumno ki Pulit ki long ki nongbat ia ka aiñ bad kiba peit ia ka shongsuk shongsaiñ hapoh kano kano ka jaka kaba ki don (Jurisdiction), ka jingai jingiarap kaba kloi ia ki paidbah bad ruh ban pynlong ia kino kino ki jingtohkit haba don kino kino ki jingjia (Case) hapoh ki shnong ki thaw.
Kine ki khynnah skul kila ioh lad ruh ban ktah ia ki kor ki bor ba pyndonkam haba phah khubor ne kren jong ki Pulit MPRO. La ai jinghikai ia ki da u ma Noel Biam ban tip bad ban shemphang ia ka jingtreikam jong kane ka tnad MPRO.
Kane ka jingiohlad jong ki khynnah skul ban iasyllok bad ki Pulit kala ai shibun ka jingmyntoi bad ka jingshemphang halor ka rukom treikam jong ki bor Pulit.
