Ha ka sngi ba ar jong ka Dorbar Synrai kaba dei ka kynta kylli jingkylli, u Bah Ardent Miller Basaiawmoit MLA Nongkrem Constituency, u buh ka jingkylli ia ka Sorkar MDA hapoh ka jingialam jong u Conrad K. Sangma halor ka rai ba la pynbna da u Myntri Rangbah ha ka 23.8.2025 ban siew tulop hi noh ka Sorkar Jylla ia baroh 3 tylli ki Distrik Council kiba don ha kane ka Jylla.
“Kyndit ban iohi ia ka jingkylla dohnud ha ka jingialam jong ka Sorkar MDA, haba ka la Sorkar ka pynbna ban siew ia ka tulop jong ki nongtrei ka Autonomous District Council (ADC) naduh u Naiwieng 2025” ong u Bah Ardent.
U Bah Basaiawmoit u la pynkynmaw ba ha ka 22 Nohprah 2020, u Symbud Myntri Rangbah ka Jylla, da lade ula ong ba ki ADC ki don la ka jong ka tyllong bad ka Sorkar kan ym don kti ban kyrshan hynrei kumno mynta kyndit kyndit shu mih ka rai da kumwei. “Ki paidbah ki kwah ban tip ia ka jingthmu lane ka daw halor kane” ong biang u MLA ka Nongkrem.
“Kumno rai siew sa ka tulop haba tang ia ka bhah ba ki ADC ki dei ban ioh ruh kim ioh”. Dang shen ka Sorkar hi ka ong ba kam dei ka kamram jong ki ban iarap ia ki ADC ha kaba iadei bad ki nongtrei jong ka Autonomous ha Ri-lum Garo”
Shuh shuh u la ong ba kumno ka Sorkar ka shlan ban shim sa ia kane ka sienjam kaba heh nalor ialade ka dei kaba duk ha kaba ka Meghalaya mynta ka la ioh nam ba ka dei kawei na ki Jylla ba bun ram tam ha India.
Nalor kata, u Bad Ardent u la buh jingkylli ruh ia ka Sorkar MDA kaba la rai ka katei ka mat “Ha kano ka Khyrnit la thoh ba ka Sorkar kan siew ia ka tulop jong ki nongtrei ADC”.
U Bah Prestone Tynsong Symbud Myntri Rangbah ka jylla uba dei ruh u Myntri ba khmih ia District Council Affairs (DCA) u la pynksan ba ka rai jong ka Sorkar na ka bynta ki Council ka long ban iarap ia ki namar ki shem jingeh ha ka pla tyngka bad ym don kano kano ka dak harieh. Shuh shuh u la ong ba baroh 3 tylli ki Council ki dei kiba pynlut kham bun ia ki jingioh, kumta ka Sorkar ka la tyrwa da kane ka lad.
U Myntri u la iathuh ruh ba ka Sorkar ka la thaw ia ka Committee ban khmih bad iakren bad ki Council ha kaba iadei bad katei ka rai bad tang hapoh 45 sngi yn sa ai ia ka Kaiphot kaba biang.
