Ka ophis jong ka District Hub for Empowerment of Women (DHEW), hapoh ka tnad Social Welfare, West Jaintia Hills District, ryngkat ka jingïatreilang bad ka ophis jong ka District Aids Control Officer, DISHA, West Jaintia Hills, kila pynlong ïa ka programme jingai jingtip halor ka koit ka khiah kaba iadei bad ki kynthei. Ia kane ka campaign la pynlong ha Raliang Community Hall mynta ka 9 tarik u Nailur. Kane ka prokram ka la pynshong nongrim halor ka jingpang Anemia ha ki khynnah bad ki kynthei, ka jingpang cancer kaba ktah ïa ki kynthei, HIV/AIDS bad kumjuh ruh ka jingtip ia ki skim lem bad kiwei ki jingtrei ia ki kynthei.
Ka kong M. Papiah, ka nongai jinghikai ïa ki khynnah rit ha Laskeiñ CHC, ka la kren halor ka jingpang Anaemia, da kaba kdew bniah ïa ki daw ba wanrah ïa kane ka jingpang, ki dak ki shin bad ki lad ban iada bad tehlakam.
Ka kong D. Suchiang, PHN Laskeiñ CHC, ka la pynshai bniah halor ki jait jingpang cancer bapher bapher kiba ktah ïa ki kynthei, ki jingma kiba lah ban wan, ki dak ba nyngkong, bad ki lad iada, jingtest bad jingai dawai.
Ka kong N. Rynniaw, kaba dei ka Data Monitoring and Documentation Officer, ka la pynshai halor ka HIV/AIDS, kumno ka saphriang, ki dak jingpang, ki lad ai dawai bad ki kyndon hapoh ka ain HIV/AIDS.
Ka kong Y. Kyndait, ka Gender Specialist na ka District Hub for Empowerment of Women (WJH), ka la kren halor ka POCSO Act, da kaba pynshai bniah shaphang ka jing ai jingïada ïa ki khynnah, ki hok jong ki khynnah bad ki samla, bad ka jingdonkam ban pyntip kloi lada don kano kano ka jingshah pyndik.
Ka kong S. Meliora Lamare, na ka DHEW, West Jaintia Hills District, ka la ai jingpynshai halor ki skim jong ka Mission Shakti kiba ïadei bad ka jingiada ïa ki kynthei bad ka jingshngaiñ de ïa ki.
Ha kane ka prokram la ïashim bynta da ki samla pule, ki nonghikai na ar tylli ki skul, Jehoval Jireh Secondary School Raliang bad Kwor Dolloi Secondary School Raliang, lem bad ki kynthei, ki nongtrei Anganwadi, ASHA, bad ki nongtrei na ki Sub-Centre bad Laskeiñ CHC. La pynïaid ïa kane ka prokram da u ma L. Dkhar, President jong ka VDP Raliang.
