Ha ka sngi ba lai jong ka Dorbar Synrai 2025, u Bah Ardent Miller Basaiawmoit, MLA Nongkrem Constituency, hynne ka sngi u la buh ka jingkylli ia ka Sorkar lyngba u Myntri ba khmih ia ka Tnad Pynroi Sor, u Bah Sniawbhalang Dhar ha kaba iadei bad ka jingpyntrei ia ka Projek “Smart City” ha ka Jylla.
U Bah Ardent u la ong ba ia kane ka Mishon, la pyllait da ka Sorkar pdeng da ka jingthmu ban pynitynnad bad pynbha ia ka jingim jong ki briew kiba don ha kane ka Jylla, kata da kaba wanrah ia ki Jaka Sumar ba bha, ki Shlem ai jinghikai (Skul/College), ki jingshakri ne ki jingpynmyntoi ia ki Paidbah, ka jingshngain ia ki paidbah, ia ka imlang sahlang bad kiwei kiwei. “Ngam iohi ia kata ka jingpynbha la ka long ha ka liang ki Jaka Sumar, ki Shlem ai jinghikai, ka jingshngain bad ka sawdong sawkun. Pynban nga i kumba ka jingpynleit jingmut jong ka Sorkar ka dei tang na ka bynta ki jingshna ia ki ïing lane ki jaka pynlong Iew na ka bynta ban ia khaïi (Commercial Complex).
Haba jubab ia ka jingbuh jingkylli jong u Bah Ardent, u Bah Sniawbhalang u la ong 77.81% la pyndep ban pyniaid ia kane ka projek, kata haduh ba kut jong u Naitung 2025. “hooid ka long ka jingshisha ba mynta ngi dang sdang ia ka wat lane ka bynta ba nyngkong (Phase I) jong kane ka projek, hynrei ynda ngi la sdang ia ka Bynta ba ar jong kane projek, yn sa iohi ia kita ki projek kiba donkam bad kiba myntoi ia kiba la kdew da u MLA Nongkrem”. Shuh shuh u la ong ba ia kitei ki jingthmu ban wanrah ia ki jingmyntoi la dep ban pynlong ia ka jinglang bad la iatai ruh shibun ki mat ha kaba yn pynsuk ia ki paidah.
Hadien ba la ioh ia katei ka jubab, u Bah Basaiawmoit u la buh jingkylli sa shisien ia ka Sorkar lyngba u Myntri, ba katkum ka kaiphot, ka Sorkar ka la dep ban shna ia kita ki jaka kilan met ne ki Gym ha ki jaka paidbah, “haei la buh bad katno la pynlut” kylli u MLA na Nongkrem. Haba jubab ia katei ka jingkylli, u Myntri u la iathuh ba 5 klur la pynlut na ka bynta katei ka projek. Ki jaka ia kiba la buh ki long ha Governor House Complex, ha Madan Mawprem, Jaiaw Shyiap Community Hall, Nan Polok, Madan Skul Wahingdoh, Arya School, Jhalupara, Shillong, Laban Assamese Madan Laban, Mawkhar Christian H. S. School, Shillong, Malki Presbyterian School, Shillong Public School Laitumkhrah, Shillong.
Namar ka jingbymsngewhun ia ka rukom treikam jong ka Sorkar, u Bah Ardent u la wanrah biang ia ka jingkylli ha kaba iadei bad ka Smart City Project, kata ka jingtei ia ka Iew ha Polo (Polo Commercial Complex) ia kaba la dep pura bad la plie ruh ha kine ki khyndiat bnai da ka President jong ka Ri ha ryngkat ka jingdon jong u Myntri Rangbah ka Jylla, hynrei kaba lyngngoh ka long ba katei ka Iew kam pat treikam haduh mynta bad ym ioh jingtip haduh katno dukan ki don” kylli u Bah Ardent. “Kane ka projek ka dang iaid mynta bad baroh ki Dukan ki don haduh 109 tylli”. Jubab u Myntri ba khmih ia ka Kam Pynroi Sor.
