[U Andrew Simons u dang pyni ia ka aplikeshon u Liminson D Sangma ba la pdiang mynta ka sngi, ha ka jingdonlang u Lamphang ka ïingdorbar u Thomas A. Sangma]
U Limison D. Sangma uba dei u MLA jong ka Raksamgre Assembly Constituency mynta ka sngi u la thep kyrteng na ka bynta ka shuki Deputy Speaker jong ka Meghalaya Legislative Assembly.
Kane ka shuki Deputy Speaker kala thylli noh hadien ka jingiehnoh kam jong u Timothy D. Shira dang shen ha kane ka taiew.
Na ka liang jong u Commissioner and Secretary jong ka Meghalaya Legislative Assembly, u Andrew Simons, ula pyntip ba dei tang u Limison D. Sangma uba la thep kyrteng haduh mynta ka sngi. Ia ka jingthep kyrteng jong u Sangma la tyrwa da u MLA ka Williamnagar u Marcuise N. Marak bad u MLA ka Phulbari u Abu Taher Mondal kiba dei ruh ki Myntri ka sorkar Jylla.
Ka jingthep kyrteng kan kut mynta ka sngi bad lashai (11.09.2025) kan dei ka jingweng kyrteng katba ka jingiajied ia kane ka kam kan long ha ka sngi Thohdieng 12.09.2025. U Simons ula ong ba haduh mynta na ka liang jong ka liang pyrshah kim shym la thep kyrteng.
