Shillong: Ha ka sngi ba pynkut ia ka Dorbar Synrai, u Lamphang (Speaker) jong ka ïing Dorbar thawaiñ ka jylla u Thomas A. Sangma ula pynbna ba la jied ia u Limison D. Sangma, MLA ka Raksamgre kum u Deputy Speaker ba thymmai jong ka ïing Dorbar, khlem kano kano ka jingialeh pyrshah.
Ka jingjied thymmai ia kane ka shuki ka long hadien ka jingiehnoh kam jong u Timothy D. Shira. Namar ka jingbymthep kyrteng jong ka liang pyrshah kumta u Limison ula jop suk ia kane ka shuki.
Haba ai jingkren u Limison D Sangma ula ai khubor ia baroh arliang kata ia ka liang synshar bad ia ka liang pyrshah namar ka jingshaniah kaba kila ai ha u.
U Limison ula ong ba un trei ia ka kam khlem kano kano ka jingsha shiliang bad ban pyniaid ia ka Dorbar da ka lynti kaba khuid.
U la ong ruh ba un shim ka jingkitkhlieh kaba kongsan kum u Deputy Speaker bad ruh kumjuh kum u nongmihkhmat jong ka Raksamgre na ka bynta ka jingmyntoi jong ka Constituency jong u. U khmih lynti ruh ba yn sa lah ban wanrah ia ka jingpynthymmai hapoh ka ïing Dorbar ka Jylla.
