Khliehriat : U Bah R.Siangshai u nongwad RTI uba wad ïa ka RTI ban ïoh ïa ka jubab ha ka jingïadei bad ka rukom thung kam thung jam hapoh ka EJHD District lyngba ka DSC ha ka 12 tarik u bnai Nailur 2025 u la pyrshang biang ban ïoh ban ïakynduh ïa u (PIO) Public Information Officer ban ïakren halor ka (RTI) Right To Information kaba lai kaba u lah dep ban buh ha ka 31 tarik u bnai july 2025.
Kane ka jingwan jong u Bah Siangshai ha Office u DC ka dei halor ka jingkwah ka jong u ban ïakynduh markhmat bad u PIO ban kylli halor ka RTI kaba lai ha kaba na ka liang ka Office ka lah dep ban phah ïa u ban leit peit ïa ki jubab ha ka jingïadei bad kane ka RTI kaba lai katta naduh ka 2 tarik u bnai September 2025 ha kane ka juh hi ka sngi namar ba u Bah Siangshai u khlem hun ïa ka jubab kaba u lah dep ban ïoh u la pyrshang ban ïakynduh ïa u PIO ha katei hi kajuh ka sngi hynrei na ka jingbymdon jong u PIO ha katei ka sngi ki la phah wan biang ïa u ha ka sngi kaba bud, hynrei naduh katta ka sngi ka 2 tarik u bnai September 2025 haduh mynta ka sngi u Bah Siangshai u khlem ïoh ïa ka lad ban ïakynduh bad u PIO.
U Bah Siangshai haba kren sha ki lad pathai khubor u ong ba lada u PIO u khlem lah ban wan mih sha Office na ka liang ki nongtrei ki dei ban pyntip sha u khnang ba un ïoh ban wan ha kawei pat ka por hynrei na ka liang ka jong ki, ki phah wan ïa u man la ka sngi hynrei wat lada katta ruh u PIO u khlem don ha Office, u Bah Siangshai ha ka 12 tarik u bnai nailur 2025 u la wan lang ha ryngkat bad ki sengbhalang ban ïoh ban kylli na kaei ka daw ba u PIO u khlem don ha Office, hynrei na ka liang ki sengbhalang ruh haba ki mut ban ïakynduh pat ïa u (DC) Deputy Commissioner u khlem treh ban ïakynduh bad ki bad u la phah wan noh ïa ki ha ka sngi nyngkong.
Shuh shuh u Bah Siangshai u ong ba ka Office u DC ka dei ka Office jong u Paidbah ïa ki shuthi pang ne shitom u PIO u lah ban shim katkum ka jingdonkam ka jong u hynrei ban shu phah mih ïa u kumne sha Office bad khlem ïoh ïa ka lad ban ïakynduh kam long kaba bha bad ka pynjynjar ruh ïa ki paidbah.
