Ka National Highway Demanding Committee (NHDC), SWKHD ha ka 12 tarik u Nailur 2025 ka la ïoh ban pynlong ïa ka jingïalang paidbah ha Dorbar Hall Mawkyrwat hapoh ka jingïalam u Bah Kynpham Kharlyngdoh, Chairman, Bah Commander Shangpliang, Assistant Secretary Bah Wallam Syiemiong Vice Chairman, ki Rangbah shnong, ki Sengbhalang bapher bapher bad kiwei kiwei ki riew Rangbah na ka bynta ban ïa phylliew jingmut ban pynkynmaw biang ïa ka sorkar jylla bad ïa ka sorkar pdeng na ka bynta ka surok National Highway na Mawngap, Weiloi, sha Mawkyrwat kaba naduh u snem 2017 ka sorkar kala sdang ban pruid dak hynrei haduh kine ki sngi kane ka surok kam shym la urlong.
U bah Kynpham Kharlyngdoh bad kiwei de ki nongkren ki la ong ba ki pdiang ïa ka jingtyrwa ka sorkar ban ai daka surok Intermediate na Weiloi shaduh Kenïong hynrei ki buh jingkylli pat ïa ka sorkar ba shaei ka jah ka National Highway kaba la dep pynbna da ka sorkar naduh u snem 2017, khamtam ka Mawkyrwat ka dei ka District Headquarter kumta la sngew dei ba kan ïoh noh ïa ka National Highway.
Ka synjuk ka la shim ia ka rai ban lum ia ki paidbah ha ryngkat ki nongmihkhmat kata ia ki MLA bad MDC jong ka Mawkyrwat bad Ranikor Konstitwensi bad ia ki sengbhalang bapher bapher ban ia thir sani bha na ka bynta ka surok National Highway na Mawngap shaduh sha Ranikor.
