Ka jingiam briew bad ka jingduhnong kaba khraw ia ka Jylla halor ka jingkhlad noh u Dr. D.D. Lapang – Myntri Rangbah barim ka Jylla hynnin ka miet ka 12 Nailar 2025 ha Bethany Hospital Shillong.
Ha ka 8 tarik mynta u Bnai kaba dei ruh ka sngi ba sdang jong ka Dorbar Synrai, u Myntri Rangbah ka Jylla – Conrad K. Sangma u la leit ban jngoh ia u Dr. Lapang ha ka iingsah jong u kaba don ha Lachumiere, Shillong. Katei ka jingleit jong u MR kadei hadien ba la wai ka Dorbar ryngkat bad katto katne ki MLA bad Myntri Sorkar.
Ha ka jingioh iakren bad u Conrad, u la iathuh ba ha ka jingleit jong u ha katei ka sngi, u Dr. Lapang u dang ithuh ia u, hynrei namar ka jingshitom ym ioh ban iakren ei ei bad la shu kitbok ba un koit un khiah. Kane ka jingkhlad ka dei ruh kaba kham phylla, ba hadien ba kut ka Dorbar Synrai, ki bahaiing jong u Dr. Lapang ki la pyntip sha u MR ba la kit noh ia u sha Bethany namar ba la kham shitom jur bad ha ka jingleit mareh jong u Conrad sha Hospital, la iathuh ba u Dr. Lapang u khlem ithuh shuh ia u MR bad ka dur khmat jong u ka la kylla. Tang hadien khyndiat kynta ba la ioh ban leit peit markhmat ia u Myntri Rangbah Barim ka Jylla, la ioh ka khubor ba u la khlad noh.
U MR u la pyntip ba kum ka dak ka jingburom ia u Myntri Rangbah barim ka Jylla uba dei ruh u Nongaibuit sha u MR ba mynta (Adviser), ka Jylla kan pynlong ia ka jingiam briew ba 3 sngi bad ia ka Lama lai rong jong ka Ri kaba don ha kylleng ki jaka, yn pynher tang mar shiteng.
Ha ka 15 tarik (Sngi nyngkong), yn pyndep ia ka jingleh burom bad ka jingleit ontep ha kaba ia ka program yn sdang naduh ka por 10 baje myntsep ha ka iingsah jong u ia kaba yn pyniaid da ka Balang Presbyterian Jaiaw bad yn bteng ia ka jingleh burom da ka Sorkar Jylla ha Madan Student, Jaiaw Shillong naduh ka por 1:00 noh phaisngi, hadien katei ka program, yn sa leit ban buh ia ka Met ba sah ha u Lum jingtep ka Balang Presbyterian Jaiaw, ha Weiking.
