Hadien ka jingialang ba la long ha ka 13 tarik Nailur 2025 ha Tura, ki nonghikai skul hapoh ka Shatri jong ka Federation of All school Teacher of Meghalaya (FASTOM ) ki la rai ban pynlong da ka jingiakhih ka ban sdang naduh ka 22 tarik Nailur 2025 ha Shillong bad Tura.
Ha ka 22 tarik Nailur 2025 kin sdang shwa da ka jingialang paidbah jong baroh ki skul Adhoc bad pynbud sa ka jingiaiaid paidbah ka ban sdang na Madan Malki ha ka por 11baje mynstep, bud sa ka jingshong kyllaiñ myngngor, kaba khlem buh por ha ka juh ka sngi tad haduh ka sorkar kan leh ei ei halor ka jingdawa jong ka kynhun.
Ha Garo Hills ka jingiashong kyllaiñ myngngor kan sdang ha ka 24 tarik Nailur 2025 naduh ka por 11 baje
Na ka liang u Sanborn Jungai, Vice President Fastom Central Bordy u la buh ka jingkyrpad bad kyntu sha baroh ki School Managing Committee SMC jong ki skul shnong bad ki skul Mission ba kin shah ia ki nonghikai ban iashim bynta lang ha kane ka jingpynlong ia ka jingiakhih ban dawa ia ka hok.
Nalor kata u la pyntip baroh ki jingdawa jong ka kynhun kan urlong lada ka sorkar ka don ia ka mon bad ka kynhun ka kyntu ia ka sorkar ban kyntiew kyrdan noh ia ki skul Adhoc sha ki skul Deficit bad kiwei kiwei ki mat ba donkam.
