Ki Paidbah na kylleng ki shnong ba don ha sor Shillong bad khappsor hynne ka sngi ka 16 tarik Nailur 2025 ki la wan ai khublei khadduh ia i heprit Insaphira Lyngdoh Mawnai, ha shwa ban leit on tep ia i ha u lum jingtep ka Balang u Blei ha Nongrah.
Kum ban shu pynkynmaw i Hepbrit Insaphira Lyngdoh Mawnai i la jah na ïing ha ka step jong ka sngi U Blei bad hadien kane ka la don jingiawad shnong ia i Hepbrit bad ha ka step sngi nyngkong, la lap ia ka met i Insaphira Lyngdoh Mawnai da u Misteri Shna ïing ha kawei na ki ïing ba dang shna ha Nongrah.
Na ka liang u Kpa jong i Insaphira Lyngdoh Mawnai u kyrpad jur ia ki paidbah ba kim dei ban buh ia ka dur jong ine i Hepbrit namar ka ktah ia ka longïing longsem jong ki.
Ha kane ka sngi lah ioh ruh ka jingkren na ki nongialam shnong bapher bapher, kynthup ia u MLA ka Nongthmmmai, Bah Charles Pyngrope, Bah Jemino Mawthoh bad kiwei kiwei ha ryngkat ka jingpynpaw ia ka jingsngewlem sha ka ïing ka sem i Hepbrit Insaphira Lyngdoh Mawnai.
Na ka liang ka Shnong Nongrah ka pynpaw ia ka jingsngewlem halor kane ka jingjia ia i hepbrit Insaphira Lyngdoh Mawnai bad ka shnong nangne shakhmat kan sa shim ki sienjam ban pyntikna ia ka suk ka saiñ ha kane ka shnong.
