Ka jingtwa jong u surok Shillong-Dawki Road kaba la jia ha shnong Dawki, West Jaintia Hills District kala wanrah ia ka jingthut ha ka leit ka wan jong ki kali motor.
Mynta ka sngi na ka liang jong ka Addl. Deputy Commissioner, ka Pynursla Civil Sub-Division, Pynursla kala pynmih ia ka jingpynbna paidbah bala pynrkhing ia ka leit ka wan jong ki kali lyngba katei ka surok (Shillong-Dawki).
Kumta ha kaba iadei bad kane la khang ia ki kali heh kiba kynthup ia ki kali kit mar, ki bus kit briew, naduh ki bynta jong ka Lad-Umsyiem haduh ba poi ha katei ka jaka ba jia kane ka jingtwa jong u surok ha shnong Dawki, hajan ka jaka ba shong lieng ha Wah Umngot. Katba ki kali rit ki lah ban iaid da kaba husiar.
Ki bor pyniaid Sub-Division kila kyntu ia ki nongleit nongwan ban kohnguh bad iatreilang bad kane ka jingpynbna paidbah, khnang ban lait na kino kino ki jingjia ba sngewsih.
Na ka liang ki bor pyniaid kin sa ai jingpyntip pat hadien ba la dep ban pynbha ia katei ka surok ba la twa.
