Ka seng Hynniewtrep Integrated Territorial Organisation (HITO) South West Khasi Hills District hapoh ka jingïalam u samla Bitnam Nongsiej, Working President ryngkat ki seng longkmie bad ki dkhot ka VDP bad ki nongïalam shnong Mawkyrwat ha ka janmiet jong ka 16 tarik u Nailur 2025 ki la leit ban ïakynduh ïa u Manager bad ki nongkitkam jong ka San Kur kiba dei trai bad pyniaid ïa ka ïew Mawkyrwat ban ïa thir ïatai halor kumno ban teh lakam bad ban rat dyngkhong ïa ki kam sniew hapoh ïew Mawkyrwat.
Kumba la ïohi ba ka jingdon jong ki nong die kyiad beaiñ bad ka jingshong pathar ki nongdie bad nongdih kyiad ha ki kyndong kynshrot ka wanrah ïa ka jingbymshngaiñ ïa ki nongïaid nongïeng bad kaba long ruh kum ka lad bad jaka rieh ïa ki nongdih drok bad kiba ju mlien ban leh ïa ki kam sniew.
Na ka liang ka seng ha kane ka jingïakren ka la ai jingmut ïa ka San Kur ba kan pyntip ïa ki trai jaka bad trai ïing kiba lah ieh ïingjah ba ki dei ban pynbha noh bad ymdei ban shu ieh khongreng kumto namar ki kylla pynban kum ki ktem sniew.
Ka seng ka la ai jingmut ruh ba kin pynlong noh kum ka ïew die jhur lane kiwei kiwei ha jan basa doh khnang ba kan long ka jingshynraiñ ïa ki nong leh kam sniew ha kato ka jaka.
Ka jingïakren ha kane ka sngi ka long kaba seisoh ha kaba na ka liang ka San Kur ka la kular ba kan ai jingïatreilang kum shi bynta ban rat dyngkhong ïa ki kam sniew hapoh ka ïew Mawkyrwat.
