Hadien shi sngi ba la shah pynbam smai kum u Myntri ba thymmai ha ka Sorkar MDA 2.0 ba la lam khmat da u Myntri Rangbah ka Jylla Conrad K. Sangma, hynne ka sngi ka 17 Nailar 2025, u Bah Metbah Lyngdoh u la shah pynkhamti ban khmih ia ki Tnad Bording, Water Resource, Taxation bad Tnad Textile.
Ha ka jingioh ban shimti ia kitei ki tnad na u Myntri barim, u A.T. Mondal, u Bah Metbah u la pynpaw ia ka jingsngewhun halor ka jingbynta kam jong u Myntri Rangbah da kaba ong ba un shim da ka jingkitkhlieh ia kano kano ka kam ia kaba tynrong ha ki tyrpeng jong u. Shuh shuh u la ong ba ka kam ban long u Myntri ban khmih ia ka Tnad Bording ha ka sien ba nyngkong ka long kaba thymmai hynrei kane kan ym pynlong ia u ban kynran dien hynrei ban pdiang kumba long bad leh ia kaba bha tam. Watla katta u la ong ba ka kam ka long kaba thymmai hynrei u la ong ba u kloi ban hikai bad shah hikai na ka ban pyntikna ba ki paidbah kin ym mad ia ka jingeh khamtam ha ka por miet.
“Ka dei kajuh ka jingkitkhlieh bad phi hap ban shim la ka long kumno kumno ruh. Kano kano ka Tnad ka long kaba eh bad kaba kob ia phi bad ka Tnad Bording ka dei kaba thymmai hynrei nga sngewtynnad ban mad ia kitei kiei kiba eh ha ka jingim jong nga”.
Nalor kata u la ong ba ka Tnad ka la mad shibun ki jingiaid lynti ha kine ki snem bad na ka bynta ka jingbit jingbiang, u la kular ban shimkhia namar kane ka dei ka kam ba hap ban buddien man ka sngi.