U Bah Reachingson Siangshai ha ka 17 tarik u bnai Nailur 2025 u la wan biang sha ka office u (DC) Deputy Commissioner ka East Jaiñtia Hills District ha ka jingïadei bad ka RTI kaba u lah dep ban buh naduh ka 31 tarik u bnai July 2025 ban ïoh ïa ka jubab lyngba ka RTI ha ka jingïadei bad ka rukom thung kam thung jam hapoh kane district.
Ha kane ka sngi u Bah Siangshai u la wan ban buh pat sa ïa ka First ‘Appeal’ na ka bynta ka RTI kaba lai kaba u lah dep ban pan naduh ka 31 tarik u bnai July 2025 ha u ‘First Appellate Authority’ u Shivansh Awasthi uba long ruh u DC ka EJHD, u Bah Siangshai haba kren sha ki lad pathai khubor hadien ba u lah dep ban buh ïa ka ‘First Appeal’ na ka bynta ka RTI kaba lai u ong ba u la hap ban ap ïa u DC naduh ka 11 baje mynstep hynrei na ka daw ba u DC u khlem don ha ka Office trei kam u hap ban buh ïa ka ‘Appeal’ ha ka general branch u Bah Siangshai u la ong ruh, ha ka jing ïadei bad ka jingkwah ka jong u ban ïakynduh ïa u PIO namar ba u khlem shai ha ka jubab RTI kaba lai u ong ba u la pyrshang ban ïakynduh bad u mynta la bun bun sngi hynrei u PIO u khlem don ha ka Office trei kam bad na ka daw jong ka jingsngewkhia ka jong u ym banse ban pyntip sha ki sengbhalang bad haduh mynta u Bah Siangshai u ong ba u lah dep ban thoh sha ki 12 tylli ki sengbhalang kiba don hapoh ka District ban tuklar ïa kane ka rukom don ki Sahep lane ki Officer hapoh ka Office.
Shuh shuh u Bah Siangshai u la ong ba na ka daw ka jingsngewkhia ka jong u halor kane ka kam ym banse u la hap ban pyntip sha uwei u Rangbah uba paw khmat hapoh ka District uba long u nongïasaid aiñ bad uba ju trei mon sngewbha ban ïarap ïa u halor kane ka jingwad RTI kaba u lah dep ban buh haduh lai tylli ka RTI haduh mynta.
Ha ka jingïadei bad ka pisa nar bad ka pisa khutia, kaba u la pyrshang ban siew ïa ka RTI kaba lai u la ong ba na daw ka jingbymhun ka jong u ïa ka jubab kaba lai bad ba u la kwah ban ïakynduh ïa u PIO ban ïakren halor kane hynrei na ka daw ba u PIO u khlem don ha Office u hap ban pyrkhat pat da kawei ka lynti ne ka sienjam halor kane.
U nongïasaid aiñ bad uba ju trei mon sngewbha hapoh kane ka District u Ma Kerlang Ksoo pat u ong ba kum ki IAS Officer lane ki Public Servant ki dei ban don katta ka jingkitkhlieh ka jong ki na ka bynta ki paidbah haba ki wan poi sha ka Office ban wan donkam hynrei phewse kine haba peit ïa ka rukom trei kam ka jong ki i kumba kim mon lane kim kwah ban trei bha ïa katta ka kam kaba la bynshet ha ki, u la ong ba dei na katta ka daw bad haba u peit ïa ka jingïaid lynti jong u Bah Siangshai ka la pynlong shuh shuh ïa u ban mih shakhmat ban don katta ka jing kitkhlieh na ka bynta ka bha ka miat ka District bad khamtam eh na ka bynta ki khun samla kiba thmu ban thep kam thep jam hapoh kane ka District namar lada kim mih mynta lano pat kin mih ban sngap ïa ka sur jong ki samla.
U Ma Kerlang Ksoo u la ong ruh ba kum ki Public Servant kim dei ban kiar ïa ki paidbah ban ïakynduh bad ki namar katkum ka aiñ ka la don ruh ka act ba ki Public Servant ki dei ban leh ïa la ka jong ka kamram na ka bynta u Paidbah bad lada jia ka long kumne shi kumne wat kitei kiwei ruh kiba kwah ban wad ïa ka RTI kim nud shuh ban wad namar ba la shah pyndik palat ha kita ki Officer da kaba ong wan lashai lashisngi hynrei haba ki wan pat kine ki Officer kim ju don, na ka liang u Ma Ksoo u la ong ruh ba kane ka jingwan buh RTI jong u Bah Siangshai haduh mynta ka long beit thik katkum ka RTI Act kaba u la kwah ban ïoh ïa katta ka jubab na ka office treikam u DC hynrei kane ka pyni ba kine ki Officer kiba posting hapoh kane ka District kim kwah ban trei bha ïa kane ka kam.
U Ma Ksoo u la ong ba un ïai don lang bad u Bah Siangshai nangne shakhmat halor kane ka kam RTI bad na ka daw ka jingbym lah ban leh marwei ïa kano kano ka kam ki hap ban ïatreilang khnang ba kin lah ban wanrah ïa kano kano ka jingmyntoi na ka bynta u Paidbah bad ka ‘Appeal’ kaba u Bah Siangshai u lah dep ban buh katta na ka bynta ka RTI kaba ar bad ka RTI kaba lai lada wat ïa kane ka ‘Appeal’ kaba u Bah Siangshai u lah dep ban buh kim lah ban ai ïa ka jingpynshai ne ka jubab kim banse ban leit shaduh shalor katta sha ka (SIC) State Information Commissioner ban ïoh da ka jubab kaba paka halor kane ka jingkheiñ sting kine ki Officer ban ai ïa ka jubab RTI napoh ka District.
