U ma Wailadmiki Shylla uba dei ruh u MLA ka Jowai Constituency ha ka jingkren sha ki lad pathai khubor mynta ka sngi Balang haka jingwan hiar jurip jong u ïa ka Iawmusiang, ula ong hadien ka jingshah jied jong u kum u myntri ka sorkar jylla ban peit ïaka tnad ka koit ka khiah, ka Sports & Youth Affairs bad ka Home (Passport) ula buh ïa ka thong kaba hakhmat eh ban ïada ïa ki khun samla na ki jingdih pynbuaid bad ban pynbha shwa ïaka koit ka khiah naduh ki kyrdan Primary Level.
‘Kum u myntri uba dang samla un wad ki lad ki lynti ban ïada katba lah ïa ki khun samla na ka jingngop jong ki ha ki jingdih pynbuaid ba bun jait, kata da ka jingïatreilang hapdeng ki kynhun treimon sngewbha, ki shnong ki thaw bad ka sorkar jylla ban pynleit jingmut ïaki khun samla haka kam ïalehkai Sports’.
Haka liang ka koit ka khiah kum u Myntri un shim ki lad ki lynti kiba donkam eh ban pynbha pynmiat shwa ïa ki jaka ai jingsumar kiba donkam naduh ki Grass root (Primary level), da kaba u kren shai lada lah ban pynbeit naduh ka kyrdan Primary level ki jingpang ba bun jait kim ïoh lad shuh ban kynrei.
Halor ka jingshah jied jong u hapoh ka kynhun myntri sorkar ula pynpaw ka jingai khublei ïa u Myntri Rangbah bad ïa ki ar ngut ki Symbud Myntri Rangbah ka sorkar jylla.
