Hynne ka sngi ka 18 Nailur 2025 ka Hima Sohra Tourist Committee (HSTC) ka la pynlong ia ka jingialang bad ka jingiamir jingmut ha ïing Dorbar Mawkdok halor ka jingleh jong ki nongialam ka All Khasi Meghalaya Tourist Taxi Association (AKMTTA) khlem da pyrkhat shuh ia kaei ka ban sa wan bad kaba ktah ruh ia ka bylla sngi bad ka kamai jong ki briew kiba don ha ka thaiñ Sohra.
Ia katei ka jingialang la pynlong hadien ba ki dkhot ka AKMTTA ki la sdang ban khang ia ki kali Tourist na Assam ha ki lad bapher bapher kynthup ha Lad Umshyrpi, bad Kyrdem khla kaba dei ka lynti leit Sohra. Ha katei ka jingiakynduh jong ki nongialam ka HSTC bad ki paidbah ka Thaiñ, la ioh ban iakren halor ka jingeh ba mih na kane ka jingkhang kyndit jong ki nongniah kali kamai khlem da khot ia ka jingiakren bad iamir lang bad ki briew kiba don ha ka Thain Sohra namar watla ka jingiakhih ka long na ka bynta ki nongniah kali Tourist, hynrei ka jingktah pat ka dei ia u paidbah uba la im japoh lyngba ka jingdon jong ki nongwan jngohkai pyrthei.
Ka HSTC ka kyntu ia ka Sorkar ban pynsted ia ka kam ban pynheh ia ka Kad Liengsun ha Umroi khnang ban lait kum kine ki jingeh hadien habud. Ka HSTC ka la byrngem ruh ba kin mih sha khmat lada dang don kiba pynthud bad lada ka jingpyntreikam jong ki kam urlong kim banse ban leit sha ka Ain.
Ka HSTC ka la ong ba ka sngewthuh ia ka jingeh ki nongniah kali Tourist na kane ka Jylla ba bun na ki nongniah ki la shu set sem ia ki kali bym don kamai khamtam ia kito kiba la shim da ka Ram ban sei Kali, hynrei ban rai da katei ka lynti kam long kaba dei, ong ki nongialam ka HSTC. “Kane ka kam ka donkam ia ka jingiatreilang kaba kynthup ia ka Sorkar, Tnad Tourism, ki nongniah kali na Meghalaya bad Assam na ka bynta ban iabit ia biang lang” pynpaw ki dhot ka HSTC.
Da ka jingsngewkhia halor ka jingkhihwin bad ka jingeh ba la mad lyngba ka rai jong ka AMKTTA ia kaba la ktah ruh ym tang ia ki briew ka thaiñ Sohra hynrei ia ki baroh ki nongshong shnong ka Jylla kiba la hap ban leit jingleit lyngba ka Jylla Assam, u Bah Titos Chyne uba dei ruh u MDC ka Sohra u la pynpaw ia ka jingdiaw halor kaei kaba la jia ha kaba iadei bad ki nongniah kali bad ka kam jngohkai pyrthei. “Kane ka jingiakhih ka la don ka jingktah. Hooid ngam pynrem ia ka jingiakhih jong ki Association bad kumba ngi la tip ka Sohra kadei ka jaka ba la paw bha ha ka pyrthei ha ka kam jngohkai pyrthei bad lah ban ong ba ka thain hi baroh kawei ka shaniah lut ha ka Tourism na ka bynta ka ioh ka kot”. Kane ka la ktah ym tang ia ki jaka jngohkai ha Sohra hynrei ha baroh ki jaka kiba don ha kane ka Jylla” ong u MDC ka Sohra.
Haba pynshai ia kane ka jingeh, u Bah Titos u la ong ba um iashah liang iano iano hynrei u ieng na ka bynta u paidbah. U la kyntu ruh ia ka Sorkar ban shimkhia ha kaba iadei bad kane ka mat bad khot ban iakren bad ki briew kiba don bynta lang ban pyntyllun ia ka kam jngohkai pyrthei kynthup ia ki trai jong ki Hotel, Guest House, ki Synjuk ba pyniaid ia ki kali kamai na Meghalaya bad Assam, Dorbar Shnong bad kiwei kiwei.
