Ka Federation of Khasi Jaintia & Garo People (FKJGP) Upper Shillong Circle hapoh ka jingialam jong u Samla Kitboklang Nongphlang President FKJGP Upper Shillong Circle ha ryngkat ka FKJGP Pomlum Unit, Baniuñ Unut bad ki dkhot ka Upper Shillong Circle, hynne ka sngi ka 18 tarik Nailur 2025 ki la leit iakynduh ia u General Manager ka NHIDCL ha kaba iadei bad ka jingpyntrei ia ka surok 4 lane naduh Umshyrpi ter ter shaduh Dawki.
Haba kren ha kane ka sngi na ka liang u President ka FKJGP Upper Shillong Circle u la ong ka jingwan kynduh ia u General Manager ka NHIDCL ka long ban pynkloi ia ka jingpyntrei ia ka Surok 4 lane khnang ba kan nym ktah ia ka leit ka wan ki paidbah kiba iaid lynti ha kine ki thain.
Na ka liang u General Manager u la iathuh ha ka seng ban pyntikna ba kumno kumno yn pyndep noh ia ka surok ha ki bynta jong ka thain Upper Shillong ha u bnai December ne ha u snem ban wan.
Shuh shuh u la ong ka Seng ka la kyntu ia u General Manager ban maramot ha ki kattno katne ki bynta kiba ktah ia ka leit ka wan ki paidbah khamtam ha ka dhengkali naduh sngi nyngkong, sngi thohdieng bad sngi saitjain, kaba pynsyrtok ia ka leit ka wan u paidbah khamtam ha ki thaiñ Umshyrpi haduh lad Lumawbah, ki thaiñ Sawmer, lad Mawklot, 7mer, ha ki thaiñ Baniun ban leit sha Mylliem. Ka Seng ka la iakren bad shimkhia ia kane ka bynta namar ka jingdheng kali ka wanrah jingeh ia ki khun samla ki ban sa ialeh ia ka exsamin bapher bapher ha kine ki bnai ban wan.
Na ka liang u General Manager u la kular ia ka Seng bad un bthah ia ki Contractor ban shimkhia mardor bad yn sa leit jurip ha ryngkat bad ka seng na ka bynta ban pynsuk ia ka leit ka wan ki paidbah.
Ka Seng ka dawa ruh na u General Manager ka NHIDCL ba un bthah ia ki Companies, ki Contractor ban pynbiang ia ki kot ki sla kiba biang bad ban pyrkhing, namar ym lah ban tip ki mynder kiba shah kyndang na Assam kin wan ban sah duh ha ki thaiñ Upper Shillong ha ka dur jong ki nongbylla sngi.
U General Manager u la pyntikna ban iatreilang bad ka Seng khnang ba kan ym dkoh ia ka jingpyntrei ia katei ka Surok Bah.
Khatduh ka Seng ka kyntu ia ki dorbar Shnong ba kin long kiba peitngor, bad ban iatreilang bad ka Seng haba iadei bad jingwan buhai shnong ki briew nabar bad kumjuh ban tehlakam ia ki kam sniew kiba la sdang kynrei ha ka thaiñ naduh ka kam tuh kam thiem bad kumjuh ban pyrkhing ia ka jingjyllei u Droks, ym tang ha ka thaiñ bad ha bri hynniewtrep bad ha ka jylla baroh kawei.
Ka FKJGP Upper Shillong Circle ka kyntu jur ia ki nongshong shnong ban long kiba phikir bad ban ai ka jingiatreilang bad ka Seng khnang ban tehlakam ia ka shongsuk shongshngaiñ ha ka thaiñ baroh kawei.
