Ka Akhil Bharatiya Vidyarthi Parishad (ABVP), Jowai Unit mynta ka sngi Thohdieng kala pynlong ïaka prokram pynkup burom ïa ki samla pule ka District kaba la ai kyrteng ‘U Kiang Nangbah Best Student Award-2025’, haka jingïalang ba la pynlong ha District Library Auditorium, Mynthong, Jowai.
Na ka liang ka ABVP Jowai Unit kala ïoh ban pynkup burom haduh 90 ngut ki samla pule na ki skul bapher bapher hapoh ka Ri-Lum Jaiñtia kiba la poi bha shakhmat (Topper) ha ki Examination jong ka SSLC bad HSSLC jong u snem 2025.
Ha kane ka sngi u Myntri sorkar ka jylla ba dei peit ïa ka tnad Animal Husbandry and Veterinary, Arts & Culture bad kiwei de ula long kum u kongsan haka jingdonlang u ma O. Rilando Shallam u President ba rim ka Seiñraij Jowai, u Prof. Sumarbin Umdor Pro Vice Chancellor NEHU, kong Deirisa J. Sutnga Jowai Town Unit President ABVP, ki nonghikai, ki khynnah skul nalor kiwei kiwei de.
Na ka liang u kongsan ma Shullai haba ai jingkren ula ai ka jingïaroh ïa ki samla pule kiba la ïoh ïa kane ka khusnam, lyngba kane yn dang ai mynsiem shuh shuh ba kin kiew shaphrang ha ki jingpule, ula pynpaw ka jingsngew sarong ïa ki khynnah kiba wan naka longïing ba duk hynrei da ka jingmihnot bad ka jingtrei shitom kila poi sha ka thoh ka jingjop da kaba ai nuksa ïa ki riew paw khmat ka Ri naduh u Dr. Rajendra Prasad, A.P.J Apdul Kalam, u Myntri Rangbah ba mynta ka ri u Narendra Modi, u Myntri Rangbah ba rim ka jylla u D.D. Lapang bad kiwei de.
Shuh shuh ula kyntu ïa ki samla pule ban rad diengkhong ïa u jingdih ba sniew kum u drug da ka jingïtrei lang jong baroh ban pynlong ka jingtalasi ïa baroh lang naduh ki kali Minister, ki pulit bad ki shipai kumjuh kiba donkti lang ban khaïi, khnnag ban khanglad ïa ka jingkynrei u Drug.
Ula pyntip na ka liang ka sorkar hapoh ka jingïalam u Myntri Rangbah lyngba ka skim Discretionary Grants kaba la ai sha ki MLA ban ai jingïarap sha ki nongïoh jingmyntoi ha ka por ba kyrkieh kaba long haduh 20 lak tyngka shisnem, na kane ula pynbha yn ai jingïarap 1 lak ïa ka seng ABVP na ka bynta ka jingpynkhreh ïa kane ka Prokram.
Haba pynkut u kyntu ïa ki samla ban pynleit jingmut haka pule ka puthi khnang ban ïoh ïaka jingstad na ka bynta ka lawei ba phyrnai bad kaba donkam eh ha ka jingim hashwa ban leh kino kino dei ban duwai shwa, ong u ma Shanbor.
La pynsngew ba ka seng ABVP ka dei kawei na ki seng kaba trei borbah na ka bynta ka bha ka miat jong ki khun samla ba kin don ka jingkitkhlieh kum u nongshong shnong ban trei na ka bynta ka imlang ka sahlang bad ïa ka Ri hi baroh kawei.
