Ka Kiang Nangbah Government College, Jowai mynta ka sngi Saitjaiñ 20 tarik u Nailur kala rakhe ïa ka 59th Foundation Day, 2025 haka jingïalang ba la pynlong ha Auditorium Hall jong katei hi ka College, ha kaba u Symbud Myntri Rangbah ka sorkar jylla ma Sniawbhalang Dhar ula long kum u kongsan.
Ïa ka jingïalang la pynïaid da u V.L.P Lyngwa bad ka Dr. S. Suja hashwa kane na ka liang u kongsan ula pynher ïa ka lama, ka jingkhap ïa u ribon jong ka footpath lem bad kiwei de ki jingtei ba pynitynnad ïa ka College (under ordinary rapair to Lulong College Road jong u snem 2024-25) bad kumjuh ruh la khap ïa u ribon jong ka jaka ap kali (two wheeler parking) kaba don ha sujok jong ka College.
Ka Principal jong ka College Dr. L.M Darnie kaba la pynsngew ïa ka jingïaid lynti jong ka College lyngba ka jingïarap naduh u myntri barim ka tnad pule puthi ka jylla u Dr. Prof. R.C Laloo bad kumjuh u myntri ba mynta u ma Lahkmen Rymbui kiba la pynkylladur shisha ïa ka rukom ai jinghikai kaba bha tam.
Shuh shuh kala pynsngew ka jingdon ki samla pule (enrolment) kala poi sha ka 3126 ngut haduh une u snem, bad ka College ka don 15 tylli ki Department, 116 ngut ki member, 67 ki ngut ki Teaching Staff, da kaba ai khublei ïa u Symbud Myntri Rangbah uba la ïarap ban pynïoh shibun ki skim na ka bynta ka College bad ha ki jingïalehkai Sports.
‘Kumba long mynta katkum ka jingdawa jong ka NEP 2020 kaba dang dangkam ïa ki kamra klas, ka Laboratory, ka Vocational Traning nalor kiwei de’ ong ka Principal bad ka jingeh mynta ka long ba ki nonghikai haka por mynstep (Morning Shift) ki hap ban ai jinghikai haduh 1230 ki samla pule haka jingsiew kaba rit bad ki don ki nonghikai bad ki nongtrei kim pat ïoh satia ïa ka jingsiew.
U ma Sniawbha haba ai jingkren ha kane ka sngi ula pynpaw ka jingsngewkmen ban ïadon bynta lang da kaba kyntu ïa ki samla pule ba kin long kiba minot thop ha ka jingpule haduh ban da poi sha ka thong ka jingjop kaba kila angnud da kaba ym dei ban shañiah tang ha ki kam sorkar.
Ula ong ruh ba ka sorkar shen ka dang pynkhreh ïa ka DPR kaba lah ban poi haduh kumba 25 klur na ka bynta ban pynbha pynmiat (renovation) ïa ka Kiang Nangbah College hashwa ban poi ka National Game. Ha ka juh ka por ula kular ruh ban pynïoh haduh 50 tylli ki laptop ïa kane ka College na ka bynta ka jingdonkam jong ki nonghikai.
Ban kiew shaphrang ha ka jingim ula kyntu ïa ki samla pule ba kim dei ban ïa bishni hynrei dei ban don ka mynsiem ïatreilang khnang ban pynduh pyndam noh shisyndon ïa kane ka jinglong basniew, kum u nong Jaiñtia u ong katno ka mynsiem jong u ka sngewsarong haba don ki khun samla kiba la kiew shaphrang ha ka ïoh ka kot bad ha ki liang baroh.
Ha kane ka sngi la sam ruh ïa ki khusnam sha ki samla pule ka College kiba la wan bha shakhmat (Rank Holder) ha ka exam NEHU kata haka Subject: Khasi, Zology, Education bad Philosophy, la ai khusnam kumjuh ïa ki nonghikai bala pyndep ïa ka PhD, ïa ki nongtrei ka College bad ki nongjop ha ka jingïakop Painting bad Slogan. La pynphuh shuh shuh ïa kane ka jingïalang da ki jingrwai bad ki jingshad tynrai.
