Hadien shi taiew pura ba la pynskhem bad smai kum u Myntri thymmai hapoh ka Sorkar ba la ialam da u Myntri Rangbah Conrad K. Sangma, u Timothy D. Shira Myntri thymmai ba khmih ia ka Tnad Tourism, Agriculture bad Fisheries u kular ban kyntiew ia ka ioh kam ioh jam na ka bynta ki samla da kaba pyntreikam lyngba ka tnad Jngohkai Pyrthei (Tourism) ha baroh ki distrik jong ka Jylla.
Kum ban shu pynkynmaw, u MR u la ai jingmut ia u Timothy ban hiar noh na ka Shuki Dy. Speaker ka Iing Dorbar Thaw ain ka jylla ha ka sngi sdang jong ka Dorbar Synrai bad katei ka jingthmu jong u MR ka long ban bujli da kam Myntri Sorkar.
Ha ka jingioh ban shimti ia ka tnad Jngohkai Pyrthei na u Bah Paul Lyngdoh, u Timothy u la ong ba un ai ia kaba bha tam na ka bynta ka Jylla bad kano kano ka kam ba la bynshet kan dei ia ka bha ka miat jong baroh.
U Myntri u iohi ba ka jingkyrduh kam ha ka jylla ka long ha baroh ki thaiñ bad ha kajuh ka por u iohi ba ka kam Jngohkai pyrthei ka kiew bha ha ka Jylla, kumta ban thawlad ia ki samla wadkam, u Myntri u la ong ba ka Kam Jngohkai pyrthei kan dei kawei na ki lad sha ki samla kiba angnud shisha ban ioh kam. “Ka Kam jngohkai pyrthei ka dei kawei na ki jingmyntoi bad kaba kongsan ha kaba ka don shibun ki lad iohkam na ka bynta ki samla bad ruh ia baroh ki briew kiba sah ha ki thaiñ Nongkyndong kiba trei ia ki kam Lajong, kynthup kiba pyniaid ia ki kali kamai, kiba don ia ki hotel, ki Homestay bad baroh kiba trei ia ki kam barit” ong u Myntri.
Haba ioh ban iakren ha kaba iadei bad ka jingkitkhlieh bad ka Constituency ba u khmih, u Shira u la iathuh ba ka jingshimkhia ka long ryntih khlem kano kano ka jingnoh shiliang watla u la dei u Myntri ba hap ban iaid kylleng kylleng. Shuh shuh u la iathuh ba ha u Bnai Nohprah 2025, yn plie noh ia ka Civil Hospital ha ka Constituency jong u (Resubelpara) kaba hap ha North Garo. Nalor kata u la iathuh ba u la dep ban iakren ruh bad u Myntri Rangbah ban khmih ia ki jingdonkam ha katei ka Hosptal kynthup ka jingpynrung kam Doktor.
Shuh shuh u la ong, namar ka Constituency jong u ka long kaba heh, u la ai jingmut ruh ia u MR ban buh sa 2 tylli ki PHC ha katei ka Constituency na ka bynta ka jingmyntoi ia kiba duna ka ioh ka kot bad ban pynsuk ia ki paidbah ka thaiñ baroh kawei.
