Ka sorkar jylla mynta ka sngi ka la khot ia ka jingialang bad ki kynhun ka All Khasi Meghalaya Tourist Taxi Association AKMTTA bad ki Synjuk ki Nongniah Taksi Kamai , ha ryngkat ka jingiadonlang u Symbud Myntri Rangbah u Ma Sniawbhalang Dhar, u Chief Secretary , ki ophisar ka tnad kam jngohkai, ka tnad kam pulit bad ki bor pyniaid District ban iakren sani halor ka jingdawa ka AKMTTA.
Haba kren sha ki lad pathai khubor na ka liang u Nongaiktien ka AKMTTA u bah Balajied Kupar u la ong ha kane ka jingialang ba mynta ka sngi ka jingseisoh kam long haduh kata hynrei ka la mih ka jingaimut ha kaba ia ka Committee ba la khlieh da ka tnad kam jngohkai, yn khlieh noh da ka tnad Transport bad u Symbud Myntri Rangbah un long kum u Chairman ha kane ka committee uba dei ruh u Myntri ka tnad transport.
Nalor kata u la ong hadien artaiew kan sa don ka jingkynduh biang bad ka sorkar hadien ba ka kynhun ka la phah ia ka RTA, bad u Chief Secretary ruh u hap wad jingtip na ki jylla kum ka Jharkhand, Orissa Karnataka bad ka Mumbai haba iadei bad ka RTA.
Na ka liang ka AKMTTA kan ai por 2 taiew ban wad jingtip halor kine ki RTA na kiwei ki jylla.
Shuh shuh u la ong ka AKMTTA ka la iakren halor ka Parking ha Railway Station bad ka Airport. U la ong ba ka sorkar kan ai ki ka Subsidy bad ka kynhun AKMTTA kan sa shong pyrkhat haba iadei bad kane ka bynta.
