U Myntri uba khmih ia ka Tnad Pule Puthi ka Jylla, Bah Lahkmen Rymbui u la ong ba ha ka 1 tarik mynta u bnai ka ïing Bishar ba hakhlieh duh ka Ri (Supreme Court) ka la pynmih ia ka hukum ba ki nonghikai Skul kiba khlem pat pyndep (Pass) ia ka Teacher Eligibility Test (TET) kin sa shah weng kam noh lane ki dei ban resain noh na ka kam namar kane ka kyrdan ka long kaba donkam beit ban leh ne pyndep ha baroh ki shlem Pule (Mandatory).
Ha kaba iadei bad kane ka mat, u Myntri u la iathuh ba u la dep ban lum ia ka jingialang mynta ka sngi bad ki kynhun bapher bapher kynthup ia ka SSA, FASTOM, Tnad Law bad yn bteng ruh lashai ka sngi ka 25 Nailar bad katto katne ki nongialam Saiñ Hima bad kiwei.
U Myntri u la iathuh ba kane ka aiñ kan treikam ia baroh bad ym lah shuh ban leh shiliang wat ia kito kiba la hikai palat 25 snem. Katba ia ki Nonghikai kiba la jan kut ka rta, kata kiba sah sa 5 snem kin lah ban bteng hynrei kim ioh shuh ban shah kyntiew kyrdan.
Shuh shuh u la ong ba katei ka jingpynmih hukum ban pyndep ia ka TET ka dei ban long ia ki Nonghikai kiba la pass shwa ia ka DelED, 45 % ha ka Class 12, BeD, BA.
Haba kdew ia kine ki jingbthah na ka Supreme Court, u Myntri u don ka jingdiaw namar bun ki Nonghikai ka Jylla kiba khlem pat pyndep ia ka TET Exam haduh mynta ka sngi.
