Ka Jaiñtia National Council (JNC) CEC hapoh ka Jingïalam u Bah Wanshwa Suting General Secretary ka sengkmie ha ka 24 tarik u bnai Nailur 2025 ka la leit ban ïakynduh ïa u EM ka trade u ma Jesse Suïam ban pynsngew ïa ka jingsngewkhia kaba khraw ha ka jingïadei bad ka kam khaïi kaba lah sdang ban shah knieh ha ki briew kiba nabar, naduh ki dukan dukdoh ba la dap lut sa tang kiba nabar jylla kiba longtrai.
Haka dorkhas la pynpaw ba kum ki trai ri trai muluk ki la long pynban tang kum ki Nongthied Nongpet, haba phai shaka kam bylla Sngi ruh lah dap satang kiba nabar, kane ka buh ïa ka pateng ka Ri haka jingma, lada ki Dorbar Shnong, Dorbar Elaka bad ka JHADC kim leh eiei ha ka por kaba biang.
Ka JNC da ka jingsngewkhia ka kyrpad jur ïa ka tnat jong ka JHADC kaba dei peit ïa kane ka bynta ban pyrkhat ba kumno ban tehlakam ïa ka jingroi jong ki dukan dukdoh ki briew ba nabar, khnang ban ïoh trei hi ki trai ri trai muluk khamtam ïa ka pateng ka ban wan.
Lada ka JHADC, ki dorbar Shnong, kim shimkhia ïa kane ka jingpynsngew jong ka seng, ka JNC nangne shakhmat kan nym long shuh tang ka nongpeitkai hynrei kan sa ai bor ïa ki shipai jong ka ban khynra lut ïa ki dukan ki bar jylla ha kylleng ka Ri Jaiñtia.
Na ka Liang u EM u lah kular ba ka tnat jong u ka kloi ban ïatreilang bad ka seng, bad u la kular ruh ban leh ïa kaba donkam.
Sa kawei ba ka seng ka wanrah ha ïing treikam ka JHADC ka dei ban dawa wanrah noh ïa ka tnat revenue ka JHADC hapoh East Jaiñtia Hills khnang ban pynsuk ïa ka rukom ai jingshakri bad ruh ban pynsuk ïa ka leit ka wan u paid nong East Jaiñtia khamtam u duk u suk, da kaba don kane ka tnat hapoh East Jaiñtia katno kan ai ka jingkyrkhu bah bad ka jingmyntoi ïa ka thaiñ.
Na ka liang ka JHADC ka ong ba kan ïaleh katba lah ban pynurlong ïa kitei ki jingdawa ka seng bad ka long ruh ba ka kloi ban lehbha ban wad ki lad ki lynti na ka bynta kine ki mat jingdawa ka seng.
