Hadien ka jingioh ujor na ki nongshong dukan ba shong dukan ha shilynter ka lynti iaidkjat kaba lam sha Krangshuri Falls ha kaba ki la mad jingeh ban pyndap ia la ka ïing ka sem namar ba ia ka lynti iaid kaba lam shaduh Krangshuri Falls la khang da ka Dept.of Tourism bad wah ruh da ka notice ba ym bit shuh ia ki tourists bad riewpaitbah ban iaid lyngba ia katei ka lynti na ka daw ba twa ka kynroh hapdeng lynti bad kane ka jingkhang ka Dept.of Tourism ka dei naduh u bnai June mynta u snem bad na ka liang jong ki nongshong dukan ki la wan iakynduh ia u DC bad ki bor ba dei khmih haba iadei bad kata ka kynroh bad baroh arliang ki la kular ban wan khmih ban pynbha ia katei ka kynroh, hynrei haduh mynta ym don ba leh eiei.
Hadien ka jingpan jingiarap na ka KSU War Jaintia Circle ban iarap lem ia ki halor kane bad na ka liang jong ka KSU kala leit iakynduh bad buh jingthoh sha office ka SDO Amlarem Sub-Division,West Jaintia Hills District ha ka jingsynran lang ki nongshong dukan ban kyrpad ia ka ba kan peit lem ia ka jingeh kine ki nongshong dukan kiba la mad ia kane ka jingeh ban pyndap ia la ka ïing ka sem bad pynsuk ruh ia ki tourists bad riewpaitbah ba wan peitkai ia katei kshaid.
Kumjuh ruh ka KSU ka la pynsngew ha ka SDO ba ka pyrshah jur ia kino kino kiba thmu ban pynjulor ia ki jingtei sahnam kiba la neh da ki spah snem ba la tei da ki longshwa manshwa ba don ha shilynter katei ka lynti iaidkjat kiba kynthup naduh ka lynti iaidkjat (pathway) bad jingkieng maw.
Na ka liang ka SDO ka la kular ban shimkhia mardor ia kane ka mat jingeh ki nongshong dukan bad riewpaitbah bad kular ruh ba kan phah ia u trai ba pyntrei bha noh mardor ia katei ka kynroh bad ban nym ktah ia ka lynti iaidkjat bad ia ki jingtei barim baroh.
