Ka National People Party (NPP) jong ka 2-Jowai Block Constituency mynta ka sngi 25 tarik u Nailur kala pynkup burom ïa u MLA ma Wailadmiki Shylla uba la long mynta kum u myntri ka sorkar jylla ba dei peit ïa ka tnad ka koit ka khiah bad ka Sports and Youth Affairs haka jingïalang bala pynlong ha Indoor Sports Hall Cum Auditorium Chutwakhu Jowai.
Ha kane ka sngi ki Unit bapher bapher hapoh ka 2-Jowai Constituency kila wan ban pynkup burom ïa u Myntri da ki jingai sngewbha kum ka dak ban pynsah kynmaw ïa ka jinglong myntri jong u.
U ma Wailadmiki Shylla haba ai jingkren ha kane ka sngi ula pynpaw ka jingai khublei ïa ki nongkyrshan jong u napoh ka Consituency kiba la kyrshan borbah ïa u haduh ban poi sha kane ka kyrdan myntri, da kaba ong kane ka dei lyngba ka jingduwai jong kiba bun balang.
Ula kular ruh ban treishitom ïaka tnad kaba ula bat, namar mynta ula hap ban peit ym tang ïa ka Constituency hynrei ïa ka jylla hi baroh kawei bad kine ki tnad treikam kiba ula bat ki long kiba bunkam bha.
Shuh shuh ula kyntu ïa baroh kiba wan sha kane ka jingïalang lyngba ki Unit bapher bapher ba kin trei shitom na ka bynta ka jingïakhun election ha u snem 2028. Ula ong ruh ba ka jingkhang treikam jong u ha Shillong ka pli ïa baroh kiba donkam.
Ha kane ka sngi la wan ban donlang naduh ki President, ki Secretary, ki nongkitkam jong ki longkmie bad kumjuh na ki seng samla jong ka seng NPP.
