U MLA ka North Shillong – Bah Adelbert Nongrum, hynne ka janmiet 27 Nailur 2025 u la leit ban hiar da lade sha Madan Malki, Shillong na ka bynta ban iakynduh bad ai mynsiem ia ki Nonghikai ADHOC kiba la shong kyllaiñ myngngor na ka bynta ban pynbor ia ka Sorkar Jylla ban kyntiew noh ia baroh ki Nonghikai kiba hap ha ka thup ADHOC sha ka Deficit.
Ha ka jingioh iakren bad u Bah Adelbert, u la ong ba da ka jingsngewkhia na ka bynta ki Nonghikai u la wan namar dei ma ki, kiba la ai ka jingstad ia ki khun jong ka Jylla da kaba kynthoh ruh ia ka Sorkar ba ka jingrakhe ia ka Teacher’s Day kam don jingmut lada ia ka jingdawa jong ki la shu leh kyllut. U la pynrem ruh ia ka Sorkar ba kim treh ban khot iakren na ka bynta ban pynurlong ia ka jingdawa hynrei la shu ai daw bym don pisa.
Shuh shuh u Bah Adelbert u la ong ba ka jingong bym don pisa ka dei tang ka jingkwah ban pyllait ialade na ka jingshah kdew kti bad lada don ka mon ban iarap bym don pisa dei ban pynduna ia ka jingpynlut phut ha ki Assembly, ki jingleit kylleng kylleng jong ka Assembly (tour), ka jingpynlong ia ki Tamasa bapher bapher. Nalor kata u la ai jingmut ruh da kaba ong ba ka lad ka lynti ka bun bad kawei na ki ka long ban ot noh na ki jingpynlut ha ki Committe Sorkar bapher bapher, bad ban ot na ki skhim bad ban pynrung pat sha ka thup na ka bynta ki Nonghikai.
Ym tang katta, u la kynthoh ruh ia ka Sorkar ba kim ju pyni ia ka jinglehhok hynrei la shu pyni ia ki jingtreikam shwa ka shibnai ne ar bnai jong ka Elekshon.
Na ka bynta ban pynpoi ïing noh ia ki Nonghikai bad ban bteng ia ki jingleit hikai jong ki sha ki skul bapher bapher, u Bah Nongrum u la pynbor ia ka Sorkar ba ka dei ban khot sha ka jingiakren bad ruh ban ai ka jingthoh kaba pyntikna ba ka jingdawa jong ki kan long kaba seisoh.
