Ki Pulit ka West Jaiñtia Hills District hapoh ka jingïalam u Jason Mairom, MPS Addl. Superintendent of Police bad ka kynhun Anti-Narcotic Task Force, hadien ka jingioh khubor ba don ki briew na ka jylla Manipur kiba thmu ban pynpoi ïa ki mar beaiñ kum u Drug shapoh ka jylla.
Kane ka kynhun jong ki Pulit kala pynlong ïa ka jingtalasi kali ha ki bynta jong ka shnong Phramer bad hynnin ka miet kila ïoh bat ïa kawei ka kali TATA kaba don ïa u Registration Number ML05 K 2315 hajan Phramer Police Traffic Cell, kaba dang wan na ki thaiñ Khliehriat bad ïaid sha ki phang Jowai.
Na kane ka kali ki pulit ki ïoh kem ïa ar ngut ki briew uwei bala tip kyrteng u Chuchung Serto, uba na ka shnong Nakhunjang, Kangpokpi, Manipur bad u Thanggin Towthang, uba shong na ka shnong Songpehh, Churachandpur, Manipur. La pynlong ka jinglasi ïa kine ki ar ngut bad ruh ïa ka kali jong ki, da ka jingbud ryntih ia ki kyndon jong ka NDPS Act.
Ha ka jingtalasi kaba bniah ki Pulit kila ïoh kurup 50 tylli ki synduk sabon ba thep ïa u drug heroine uba khia 512.63 gram uba shongdor sha ka T.2.5 klur tyngka. Na kitei ki briew la ïoh kurup ruh ia ka pisa kaba T.6,775 tyngka ka pisa India, T.3,000 tyngka ka pisa South Korea, T.500 ka pisa Kazakhstan Tenge, 10 Kyat jong ka pisa Burma bad 2 tylli ki mobile (Handsets).
Na ka liang ki Pulit kiba pynngat kes ïa kitei ki ar ngut kat kum ka kyndon jong ka Narcotic Drugs and Psychotropic Substances (NDPS) Act, ban pynlong ïa ka jingtohkit bniah bad ruh ban lap la ka don ne em ka jingïadei bad kiwei pat ki jingpynïaid ba kham heh kumjuh ka jingïakhaïi na shiliang pud.
Ha ka juh ka por ka tnad pulit ka kyntu jur ïa ki paidbah nongshong shnong ka jylla ba kin long kiba husiar bad ban ai jingtip mar mar sha ki pulit lada don kino kino ki briew kiba ki ishon khmat ba ki don bynta ha kane ka kam khaïi ïa ki jingdih pynbuaid (drugs).
